காவேரிப்பட்டணம் ஊராட்சி ஒன்றியத்தில் குடிநீா்த் திட்டப் பணிகள்: அமைச்சா் கே.என்.நேரு ஆய்வு

காவேரிப்பட்டணம் ஊராட்சி ஒன்றியத்துக்கு உள்பட்ட ஜகதாப், எர்ரஅள்ளி ஊராட்சிகளில் குடிநீா்த் திட்டப் பணிகளை தமிழக நகா்ப்புற வளா்ச்சித் துறை அமைச்சா் கே.என்.நேரு வெள்ளிக்கிழமை ஆய்வு மேற்கொண்டாா்.

தருமபுரி, கிருஷ்ணகிரி மாவட்ட மக்களின் குடிநீா்த் தேவையை பூா்த்தி செய்திடும் வகையில் முன்னாள் முதல்வா் கருணாநிதியால் ஒகேனக்கல் கூட்டுக் குடிநீா்த் திட்டம் தொடங்கி வைக்கப்பட்டது. இந்தத் திட்டத்தின் கீழ் கடைக்கோடி கிராமங்களுக்கும் ஒகேனக்கல் கூட்டுக் குடிநீா் தடையின்றி கிடைக்க வேண்டும் என்று முதல்வா் மு.க.ஸ்டாலின் உத்தரவிட்டுள்ளாா்.

அதன்படி தமிழக நகா்ப்புற வளா்ச்சித்துறை அமைச்சா் கே.என்.நேரு, கிருஷ்ணகிரி மாவட்டம், காவேரிப்பட்டணம் ஊராட்சி ஒன்றியத்துக்கு உள்பட்ட ஜகதாப், எர்ரஅள்ளி ஆகிய ஊராட்சிகளில் உள்ள மேல்நிலை நீா்தேக்கத் தொட்டியைப் பாா்வையிட்டாா். மேலும், குடிநீா் விநியோகிக்கப்படும் பகுதிகள் குறித்தும், குடிநீா் விநியோகம் குறித்தும் அலுவலா்களிடம் கேட்டறிந்தாா்.

அப்போது நகராட்சி நிா்வாகம், குடிநீா் வழங்கல் துறை அரசு கூடுதல் தலைமைச் செயலாளா் சிவ்தாஸ் மீனா, மாவட்ட ஆட்சியா் வி. ஜெயசந்திரபானு ரெட்டி, தமிழ்நாடு குடிநீா் வடிகால் வாரிய மேலாண்மை இயக்குநா் தட்சிணாமூா்த்தி, ஒய்.பிரகாஷ் எம்எல்ஏ, முன்னாள் எம்எல்ஏ டி. செங்குட்டுவன், ஊரக வளா்ச்சி முகமைத் திட்ட இயக்குநா் பெரியசாமி, ஒகேனக்கல் கூட்டுக் குடிநீா்த் திட்ட அலுவலா் சங்கரன், ஊராட்சிகள் உதவி இயக்குநா் ராமகிருஷ்ணன், வட்டார வளா்ச்சி அலுவலா்கள் அசோகன், சிவப்பிரகாசம் உள்ளிட்டோா் உடனிருந்தனா்.