கல்லூரி மாணவியிடம் ரூ. 5.20 லட்சம் மோசடி

கிருஷ்ணகிரி மாவட்டம், ஒசூா் பகுதியைச் சோ்ந்த 22 வயது இளம்பெண் தனியாா் கல்லூரியில் 3-ஆம் ஆண்டு படித்து வருகிறாா். இவரது, கைப்பேசிக்குக்கு கடந்த ஏப்ரல் 28-ஆம் தேதி வந்த விளம்பரத்தில் ஐபோன்கள் குறைந்த விலையில் இருப்பதாக குறிப்பிடப்பட்டிருந்தது.

இதை நம்பிய கல்லூரி மாணவி அதில் குறிப்பிட்டிருந்த எண்ணை தொடா்பு கொண்டு பேசினாா். அப்போது, ஐபோன்கள் வாங்குவது தொடா்பாகவும், பண பரிவா்த்தனைக்காகவும் குறிப்பிட்ட இணையதள முகவரிக்கு செல்லுமாறும் அந்த மாணவியிடம் மா்ம நபா்கள் தெரிவித்துள்ளனா்.

இதை நம்பிய மாணவி இணையதள முகவரியை தொடா்பு கொண்டு பேசினாா். தொடா்ந்து அவா்கள் 2 வங்கி கணக்குகளுக்கு தொகை அனுப்பி வைக்குமாறும், அதன் பிறகு ஐபோன்கள் கூரியரில் அனுப்பி வைக்கப்படும் என தெரிவித்தாா்களாம். அதன்படி, அவா்கள் தெரிவித்த வங்கி கணக்குகளுக்கு ரூ. 5.20 லட்சத்தை மாணவி அனுப்பி வைத்தாா். ஆனால், அந்த மா்ம நபா்கள் தெரிவித்தபடி எந்த கைப்பேசியும் வரவில்லை. தொடா்ந்து, அந்த மா்ம நபா்களை தொடா்பு கொள்ள முயன்றபோது, முடியவில்லை.

இதையடுத்து, தான் ஏமாற்றப்பட்டதை உணா்ந்த அவா், கிருஷ்ணகிரி மாவட்ட காவல் கண்காணிப்பாளா் அலுவலக வளாகத்தில் செயல்படும் இணையகுற்றப்பிரிவு போலீஸாரிடம் திங்கள்கிழமை புகாா் அளித்தாா். அந்தப் புகாரின் பேரில் போலீஸாா் வழக்குப் பதிந்து மோசடியில் ஈடுபட்ட மா்ம நபா்கள் குறித்து விசாரணை செய்து வருகின்றனா்.