தேவேந்திரகுல வேளாளர் பெயர் மாற்றத்துக்கு எதிர்ப்பு

தேவேந்திரகுல வேளாளர் என்ற பெயருக்கு பல்வேறு வேளாளர் அமைப்பினர் எதிர்ப்பு தெரிவித்து நாமக்கல் மாவட்ட ஆட்சியர் அலுவலகத்தில்  மனு அளித்தனர்.
பிற்படுத்தப்பட்டோர் பட்டியலில் உள்ள கொங்கு வேளாளர், சோழிய வேளாளர் சமூகங்களைச் சேர்ந்த 5 அமைப்புகளைச் சேர்ந்த நிர்வாகிகள் மற்றும் பொறுப்பாளர்கள் நாமக்கல் மாவட்ட ஆட்சியர் அலுவலகத்தில் அதிகாரிகளிடம் திங்கள்கிழமை அளித்த மனு விவரம்:
குடும்பன், பண்ணாடி, காலாடி, கடையன், பள்ளன், வாதிரியான் மற்றும் தேவேந்திர குலத்தான் ஆகிய சமூகப் பிரிவுகளை ஒன்றிணைத்து தேவேந்திரகுல வேளாளர்கள் என்ற பெயர் மாற்றம் செய்வது தொடர்பாக, சாதக, பாதகங்கள் குறித்து அறிக்கை அனுப்ப மாவட்ட ஆட்சியர்களை அரசு கேட்டுள்ளதாக அறிந்தோம்.
வேளாளர் என்பது எங்கள் சமுதாயம் உள்பட இன்னும் குறிப்பிட்ட சில சமுதாயங்களுக்கு உரித்தான ஒரு இனப் பெயர். காலம் காலமாக இந்த பெயரால் எங்கள் சமுதாயம் அடையாளப்படுத்தப்பட்டு வருகிறது.
எங்கள் சமுதாயத்துக்கு உண்டான கல்வெட்டு, செப்பு பட்டயம் போன்ற வரலாற்று ஆவணங்களிலும், பிரிட்டிஷ் ஆவணங்களிலும் வேளாளர் என்ற பெயர் எங்களை குறிக்க பயன்படுத்தப்பட்டுள்ளது.
ஆனால் ஒரு சமுதாயத்தினரோ, அவர்களின் மற்ற பிரிவினரோ எந்தக் காலத்திலும், வேளாளர் என்ற பெயரால், வரலாற்று ஆவணங்களிலோ குறிப்பிடவில்லை. புதிய தமிழகம் கட்சி தலைவர் கிருஷ்ணசாமி இன்னும் பிற சமுதாய அமைப்புகளின் வேளாளர் பெயர் கோரிக்கை நியாயமில்லாத கோரிக்கை.
அதனால் தேவேந்திரகுல வேளாளர்கள் என்று வேளாளர் என்ற பெயரை அவர்கள் சமுதாயத்துக்கு வழங்குவதற்கு எங்கள் சமுதாயம் பலத்த எதிர்ப்பை அரசுக்கு தெரியப்படுத்துகிறோம்.
அரசு இந்தக் கோரிக்கையை ஏற்கும் பட்சத்தில், தமிழகம் முழுவதும் 2 கோடி வேளாளர்களின் வரலாற்று, கலாசார உரிமைகள் பாதிக்கப்படும் என்பதையும் தெரியப்படுத்துகிறோம்.