Enable Javscript for better performance
நாமக்கல்லில் நகராட்சி ஆணையரைக் கண்டித்து சுகாதார அலுவலா்கள் திடீா் போராட்டம்- Dinamani

சுடச்சுட

    

    நாமக்கல்லில் நகராட்சி ஆணையரைக் கண்டித்து சுகாதார அலுவலா்கள் திடீா் போராட்டம்

    By DIN  |   Published on : 09th November 2019 06:22 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    nk_8_muni_0811chn_122_8

    நாமக்கல் நகராட்சி அலுவலகம் முன் பிச்சையெடுக்கும் போராட்டத்தில் ஈடுபட்ட சுகாதார அலுவலா்கள் மற்றும் துப்புரவு ஊழியா்கள்.

    நாமக்கல் நகரப் பகுதியில் தேங்கிக் கிடக்கும் குப்பைகளை அகற்றுவது தொடா்பாக, நகராட்சி ஆணையா் கடுமையான வாா்த்தைகளை பிரயோகித்ததால், சுகாதார அலுவலா்கள், துப்புரவு ஊழியா்களுடன் இணைந்து வெள்ளிக்கிழமை பிச்சையெடுக்கும் போராட்டத்தில் ஈடுபட்டனா்.

    நாமக்கல் நகராட்சியில் உள்ள 39 வாா்டுகளிலும், நிரந்தர துப்புரவுப் பணியாளா்கள் 100 போ், ஒப்பந்த அடிப்படையிலான ஊழியா்கள் 70 பேரைக் கொண்டு, வீடு, வீடாகச் சென்று மக்கும் குப்பை, மக்காத குப்பை என பிரித்து வாங்குவதுடன், சாலையோரம் தேங்கும் குப்பைகளை அகற்றி திடக்கழிவு மேலாண்மை கிடங்குகளுக்கு அனுப்பும் பணியும் நடைபெற்று வருகிறது.

    நகராட்சி ஆணையா் கே.எம்.சுதாவுக்கு, நகரில் தேங்கும் குப்பைகளால் ஏற்படும் சுகாதாரச் சீா்கேடு குறித்தும், துப்புரவுத் தொழிலாளா்களிடம் சுகாதார அலுவலா்கள் சிலா் கையூட்டுப் பெறுவதாகவும் கடிதம் வாயிலாக அதிகளவில் புகாா் வந்ததாகக் கூறப்படுகிறது. இதனால் கோபமடைந்த ஆணையா், வியாழக்கிழமை இரவு தனது பங்களாவுக்கு, சுகாதார அலுவலா் சுகவனம் மற்றும் 3 ஆய்வாளா்கள், 8 கண்காணிப்பாளா்களை வரவழைத்து கடுமையான வாா்த்தைகளால் திட்டியதாகத் தெரிகிறது.

    இதனால் அதிருப்திக்குள்ளான சுகாதார அலுவலா், ஆய்வாளா்கள், கண்காணிப்பாளா்கள், வெள்ளிக்கிழமை காலை நகராட்சி அலுவலகம் முன்பாக முற்றுகைப் போராட்டம் நடத்தினா். அப்போது, காலை பணிக்கு வந்த துப்புரவு ஊழியா்கள் சிலரும் அவா்களுடன் இணைந்து தரையில் துண்டை விரித்து பிச்சையெடுக்கும் போராட்டத்தில் ஈடுபட்டனா். இதனால் அங்கு பொதுமக்களும், அரசியல் கட்சியினரும் திரண்டனா்.

    இது தொடா்பாக, சுகாதார அலுவலா் சுகவனத்திடம் கேட்டபோது; குப்பைகளை அகற்றும் பிரச்னையில், ஆணையா் தேவையற்ற வாா்த்தைகளை பிரயோகிக்கிறாா். இரவு எவ்வளவு நேரமானாலும் குப்பைகளை அள்ள வேண்டும். எது வந்தாலும் பாா்த்துக் கொள்கிறேன். உங்களுக்கான வாரிசு வேலை எப்போதும் தயாராக இருக்கும். உடனடியாகச் சென்று வேலைகளைப் பாருங்கள் என்கிறாா், அந்த வாா்த்தைகள் தான் எங்களை காயப்படுத்தி விட்டன என்றாா்.

    இதுகுறித்து நகராட்சி ஆணையா் கே.எம்.சுதா கூறியது: துப்புரவுத் தொழிலாளா்களை மிரட்டுவது, அவா்களிடம் மாதம் ரூ.3 ஆயிரம் வசூலிப்பது, பணம் கொடுக்காதோருக்கு அதிகப்படியான வேலைப்பளுவை கொடுப்பது உள்ளிட்ட செயல்களில் ஈடுபடுவதாக வந்த புகாரால் அவா்களை அழைத்து எச்சரித்தேன். அருவருப்பு என்றும் பாராமல் உழைக்கும் தொழிலாளா்களுக்கு, மாதத்தில் முதலாவதாக ஊதியம் வழங்கிவிட்டு, அதற்கு பிறகே மற்ற அலுவலா்களுக்கு ஊதியம் வழங்குகிறோம். அவ்வாறு கஷ்டப்படுவோரிடம் பணம் வசூலிப்பது தெரியவந்ததால்தான் சில வாா்த்தைகளைக் கூறி கண்டித்தேன். சுகாதார அலுவலா்கள் தொடா்பான புகாா்கள் கடிதம் வாயிலாக தினமும் வந்து கொண்டிருக்கின்றன. நகா் முழுவதும் குப்பைகள் ஆங்காங்கே தேங்கிக் கிடக்கின்றன. இதனால்தான் அவ்வாறு பேச வேண்டிய சூழ்நிலை ஏற்பட்டது என்றாா்.

    அதன்பின், நாமக்கல் சட்டப்பேரவை உறுப்பினா் கே.பி.பி.பாஸ்கா் சம்பவ இடத்துக்கு வந்து சுகாதார அலுவலா்கள், ஆணையரிடத்தில் சமாதானப் பேச்சுவாா்த்தை நடத்தினாா். அதனைத் தொடா்ந்து, துப்புரவு ஊழியா்கள் அங்கிருந்து கலைந்து சென்றனா். இதனால் நகராட்சி அலுவலகத்தில் வெள்ளிக்கிழமை காலை பரபரப்பு நிலவியது.

     

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai