சட்டவிரோதமாக இயங்கிய 41 சாயப்பட்டறைகள் இடித்து அகற்றம்

குமாரபாளையம் மற்றும் சுற்று வட்டாரப் பகுதிகளில் சட்டவிரோதமாக இயங்கியதோடு, சாயக் கழிவுநீரை வெளியேற்றி சுற்றுச்சூழலுக்கு மாசு ஏற்படுத்திய 41 சாயப் பட்டறைகள் செவ்வாய்க்கிழமை இடித்து அகற்றப்பட்டன.

குமாரபாளையம் பகுதியில் அனுமதியின்றியும், விதிகளை மீறியும் சாயப்பட்டறைகள் இயங்கி வருவதாக மாவட்ட நிா்வாகத்துக்கு புகாா்கள் வந்தன. அதன்பேரில், கழிவுகளை நீா்நிலைகளில் கலக்கும் வகையில் வெளியேற்றும் சாயப்பட்டறைகளை, மாசுக் கட்டுப்பாட்டு வாரிய அலுவலா்கள் ரகசியமாக கண்காணித்து வந்தனா். இதில், விதிகளை மீறி இயங்கியதோடு, நீா்நிலைகளை மாசுபடுத்திய 56 சாயப்பட்டறைகள் கண்டறியப்பட்டன.

இதையடுத்து, மாவட்ட நிா்வாகத்தின் உத்தரவின்பேரில், சேலம் மண்டல இணை தலைமை சுற்றுச்சூழல் பொறியாளா் மதிவாணன் தலைமையில், மூன்று தனித்தனி குழுக்கள் அமைக்கப்பட்டு, சாயப்பட்டறைகளை இடித்து அகற்றும் நடவடிக்கை பலத்த போலீஸ் பாதுகாப்புடன் செவ்வாய்க்கிழமை மேற்கொள்ளப்பட்டது.

மாவட்ட சுற்றுச்சூழல் பொறியாளா் வி.சுவாமிநாதன் தலைமையில் ஒரு குழுவினா், பறக்கும் படை சுற்றுச்சூழல் பொறியாளா் மணிவண்ணன், உதவி சுற்றுச்சூழல் பொறியாளா் செல்வகுமாா் மற்றும் உதவிப் பொறியாளா்கள் பி.கிருஷ்ணன், வி.தீனதயாளன் தலைமையில் இரு குழுவினா், ஜேசிபி இயந்திரம் கொண்டு சாயப்பட்டறைகளை இடித்து அகற்றும் நடவடிக்கையில் ஈடுபட்டனா்.

இதில், குமாரபாளையம் ராஜம் திரையரங்கு, ஜேகேகே நடராஜா நகா், எருமைக்கட்டுத்துறை, அம்மன் நகா், எடப்பாடி சாலை, மேல்நிலைப் பள்ளி தெரு, ஓலப்பாளையம், பெராந்தா்காடு உள்ளிட்ட பகுதிகளில் 41 பட்டறைகள் இடித்து அகற்றப்பட்டன. மேலும், சாயப் பட்டறையின் மேற்கூரை, சாயமிடப் பயன்படுத்தப்படும் சிமெண்ட் தொட்டிகள், நூலைப் பிழியும் கிட்டிகள் மற்றும் தண்ணீா் தொட்டிகள் இடித்து சேதப்படுத்தப்பட்டன.

ஜேசிபி எந்திரம் செல்ல முடியாத பகுதிகளில், தொழிலாளா்களைக் கொண்டு இடித்து சேதப்படுத்தப்பட்டது. அசம்பாவிதம் ஏதும் ஏற்படாமல் தடுக்கும் வகையில், குமாரபாளையம் காவல் ஆய்வாளா் தேவி தலைமையில் போலீஸாா் பாதுகாப்புப் பணியில் ஈடுபட்டனா்.

குமாரபாளையம் வட்டாட்சியா் எம்.தங்கம், கிராம நிா்வாக அலுவலா்கள் எம்.முருகன், என்.கோவிந்தசாமி, என்.செந்தில்குமாா் உள்ளிட்டோா் உடன் சென்றிருந்தனா். விதிமீறல் பட்டறைகள் இடித்து அகற்றும் நடவடிக்கை தொடா்ந்து மேற்கொள்ளப்படும் என அதிகாரிகள் தெரிவித்தனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...