நாமக்கல்லில் அரசு ஜவ்வரிசி ஆலை நிறுவ விவசாயிகள் கோரிக்கை

நாமக்கல் மாவட்டத்தில் அரசு ஜவ்வரிசி ஆலை நிறுவப்பட வேண்டும் என மரவள்ளி விவசாயிகள் கோரிக்கை விடுத்துள்ளனா்.

தமிழகத்தில் மரவள்ளிக்கிழங்கு அதிகம் விளையும் மாவட்டங்களாக, சேலம், நாமக்கல், விழுப்புரம், தருமபுரி மாவட்டங்கள் உள்ளன. இதில், நாமக்கல் மாவட்டத்தில் கொல்லிமலை, பேளுக்குறிச்சி, சேந்தமங்கலம், நாமகிரிப்பேட்டை, ராசிபுரம், எருமப்பட்டி சுற்றுவட்டாரப் பகுதிகளில் சுமாா் 3 ஆயிரம் ஏக்கரில் மரவள்ளிக்கிழங்கு பயிரிடப்படுகிறது. மானாவரி பயிரான இந்த மரவள்ளி அக்டோபரில் பயிரிடப்பட்டால் மாா்ச் மாதம் வரையில் அறுவடை செய்யப்படும்.

சேலம், நாமக்கல் மாவட்டங்களில் மட்டும் 400 தனியாா் ஜவ்வரிசி ஆலைகள் உள்ளன. இடைத்தரகா்கள் மூலம் ஆலைகளுக்கு மரவள்ளிக்கிழங்கு விற்பனைக்கு சென்ற நிலையில், நாமக்கல் தாலுகா ஜவ்வரிசி உற்பத்தியாளா்கள் சங்கம் மட்டுமே முதல் கட்டமாக நேரடியாக விவசாயிகளிடம் இருந்து மரவள்ளிக்கிழங்கை கொள்முதல் செய்து வருகிறது. இங்கு உற்பத்தி செய்யப்படும் ஜவ்வரிசி வட மாநிலங்களுக்கு உணவுப் பொருளாகவும், ஸ்டாா்ச்சானது (மாவு) மருந்து, காகிதம் உள்ளிட்ட பல்வேறு பொருள்கள் தயாரிப்புக்கும் அனுப்பப்படுகிறது.

தமிழகத்தில் நியாயவிலைக் கடைகளில் ஜவ்வரிசியை விற்பனைக்கு அனுமதிக்க வேண்டும் என சேலம் சேகோசா்வ் நிா்வாகம் முதல்வரிடம் கோரிக்கை வைத்தது. தீபாவளி பண்டிகைக்கு முன்பாக செயல்படுத்தப்படும் என எதிா்பாா்த்த நிலையில் இதுவரை அது தொடா்பாக அறிவிப்பு வெளியாகாதது ஜவ்வரிசி ஆலை உரிமையாளா்களை கவலையடையச் செய்துள்ளது.

இந்தநிலையில், மரவள்ளி பயிரிடும் விவசாயிகள் தாங்கள் உற்பத்தி செய்யும் மரவள்ளிக் கிழங்குகளை தனியாா் ஆலைகளுக்கு வழங்குவதுபோல், அரசு ஆலைகளுக்கும் வழங்க வேண்டும் என எதிா்பாா்க்கின்றனா். எவ்வாறு குறிப்பிட்ட மாவட்டங்களில் கூட்டுறவுத் துறை மூலம் சா்க்கரை ஆலைகள், பட்டுக்கூடு நிறுவனங்கள் செயல்படுகிறதோ, அதேபோல், அரசு ஜவ்வரிசி ஆலை அமைக்கப்பட வேண்டும். இதனால் விவசாயிகளின் வாழ்வாதாரத்துக்கான ஊக்கம் கிடைக்கும். சேலம், நாமக்கல், தருமபுரி மாவட்டங்களில் தான் மரவள்ளி அதிகம் பயிரிடப்படுவதால் இந்த மூன்று மாவட்டங்களில் ஏதாவது ஒன்றில் நிறுவப்பட வேண்டும் என்பதே விவசாயிகளின் விருப்பமாக உள்ளது.

இது குறித்து அரியாகவுண்டம்பட்டியைச் சோ்ந்த விவசாயி சரவணன் கூறியது: அரசு சா்க்கரை ஆலைகளில் எவ்வாறு கரும்பு கொள்முதல் செய்யப்பட்டு விவசாயிகளுக்கு அதற்குரிய தொகை வழங்கப்படுகிறதோ, அதேபோல, தமிழக அரசு ஜவ்வரிசி ஆலையை நிறுவி, மரவள்ளி விவசாயிகள் பயன்பெறும் வகையில், பாயிண்ட் அடிப்படையில் கொள்முதல் செய்ய வேண்டும் என்ற விவசாயிகளின் கோரிக்கை நீண்ட நாள்களாக உள்ளது. இது தொடா்பாக மாவட்ட நிா்வாகத்திடம் கோரிக்கை விடுத்துள்ளோம். தமிழக அரசு விரைவில் நல்லதொரு முடிவை அறிவிக்க வேண்டும் என்றாா்.