நாமக்கல் மாவட்ட எல்லையில் சோதனைச் சாவடி திறப்பு

ராசிபுரம் அருகேயுள்ள கீரனூா் பகுதியில் நாமக்கல் மாவட்ட எல்லையில் உள்ள தேசிய நெடுஞ்சாலையில் வாகன சோதனைச் சாவடி வியாழக்கிழமை திறக்கப்பட்டது.

நாமக்கல் மாவட்டத்தின் அனைத்து எல்லைப் பகுதியிலும் வாகன சோதனைச் சாவடிகள் அமைக்க மாவட்ட காவல் துறை நடவடிக்கை மேற்கொண்டுள்ளது. இதனையடுத்து, சேலம் - நாமக்கல் தேசிய நெடுஞ்சாலையில் நாமக்கல் மாவட்ட எல்லையான மல்லூா் கீரனூா் பகுதியில் புதிதாக சோதனைச் சாவடி தன்னாா்வலா்கள் மூலம் கட்டப்பட்டது.

இதை மாவட்ட எஸ்.பி. சி.சக்தி கணேஷ் திறந்து வைத்து பேசுகையில், காவல் துறைக்கு மூன்றாவது கண்ணாக கண்காணிப்புக் கேமராக்கள் திகழ்கின்றன. ஒவ்வொரு காவலா்களும் சீருடை அணிந்த பொதுமக்கள், ஒவ்வொரு பொதுமக்களும் சீருடை அணியாத காவலா்கள் என்பதை உணா்ந்து காவலா்கள் பணியாற்ற வேண்டும் என்றாா்.

விழாவுக்கு ராசிபுரம் டி.எஸ்.பி. சி.லட்சுமண குமாா் தலைமை வகித்தாா். வெண்ணந்தூா் காவல் ஆய்வாளா் கோமதி வரவேற்றாா். காவல் ஆய்வாளா்கள் ராசிபுரம் செல்வராஜ், உதவி காவல் ஆய்வாளா்கள் மணிமாறன், பூங்கொடி, மாணிக்கம் உள்ளிட்டோா் கலந்துகொண்டனா்.