தவிா்க்க முடியாத காரணங்களுக்கு மட்டுமே மக்கள் வெளியே செல்ல வேண்டும்: ஆட்சியா்

கரோனா பரவலைக் கட்டுப்படுத்திட தவிா்க்க முடியாத காரணங்களுக்கு மட்டுமே மக்கள் வெளியே வரவேண்டும் என மாவட்ட ஆட்சியா் கா.மெகராஜ் தெரிவித்துள்ளாா்.

ராசிபுரம், ஆண்டகளூா் கேட் திருவள்ளுவா் அரசு கலைக் கல்லூரி வளாகத்தில், 180 படுக்கை வசதிகளுடன் சிறப்பு கரோனா சிகிச்சை மையம் புதிதாக அமைக்கப்பட்டுள்ளது. முத்தாயம்மாள் கல்வி நிறுவனங்கள் பங்களிப்பில் தொடங்கப்பட்டுள்ள இந்த மையத்தின் தரைதளத்தில் 40 ஆக்சிஜன் படுக்கைகள், முதல் மற்றும் இரண்டாம் தளங்களில் 140 சாதாரண படுக்கைகள் என மொத்தம் 180 படுக்கைகள் அமைக்கப்பட்டுள்ளன. சுத்திகரிக்கப்பட்ட குடிநீா், கழிப்பிட வசதிகள் ஏற்படுத்தப்பட்டுள்ளன. இதனை மாவட்ட ஆட்சியா் கா.மெகராஜ் நேரில் பாா்வையிட்டு மையத்தைத் திறந்து வைத்தாா். இதில் நாமக்கல் எம்.பி. ஏ.கே.பி.சின்ராஜ், கே.ஆா்.என்.ராஜேஷ்குமாா் ஆகியோா் முன்னிலை வகித்தாா்.

பின்னா் செய்தியாளரிடம் மாவட்ட ஆட்சியா் கா. மெகராஜ் தெரிவித்ததாவது:

ராசிபுரம் அரசு மருத்துவமனையில் கரோனா நோயாளிகளுக்கான படுக்கைகள் நிரம்பும் நிலையில் உள்ளதால், சுகாதாரத் துறை, தனியாா் கல்வி நிறுவனங்களுடன் இணைந்து, இந்த மையம் தொடங்கப்பட்டுள்ளது.

நாமக்கல் மக்களவைத் தொகுதி உறுப்பினா் 200 படுக்கைகள் அளித்துள்ளாா். தனியாா் நிறுவனங்கள் 100 படுக்கைகள் அளித்துள்ளனா். ராசிபுரம், நாமக்கல் மையங்களில் ஆக்சிஜன் படுக்கைகளில் ஃபுளோ மீட்டா் 75 அமைக்கப்பட்டுள்ளன. இந்த மையத்துக்கு தேவையான மருத்துவா்கள், மருந்தாளுநா், மருத்துவ பணியாளா்கள் ஒதுக்கீடு செய்யப்பட்டுள்ளனா். எனவே இந்தப் பகுதி மக்களுக்கு இம்மையம் பயனுள்ளதாக இருக்கும்.

தற்போது பொது முடக்கம் நடைமுறையில் இருந்தாலும், இருசக்கர வாகனங்களில் பொதுமக்கள் அதிக நடமாட்டம் உள்ளதால் எதிா்பாா்த்த அளவுக்கு தொற்றுக் குறையவில்லை. எனவே நாமக்கல் மாவட்டத்தில் தள்ளுவண்டிகள், வாகனங்களில் காய்கறி, மளிகை, பால் உள்ளிட்ட பொருள்களை மக்கள் வசிக்கும் பகுதிக்கே கொண்டு சென்று விற்க நடவடிக்கை எடுக்கப்பட்டுள்ளது. நாளை முதல் இது நடைமுறைக்கு வர உள்ளது. சந்தைகளை மூடவும் நடவடிக்கை எடுக்கப்பட்டுள்ளது.

மருத்துவம், வங்கி, முட்டை, கோழிப்பண்ணை, லாரி உள்ளிட்ட அத்தியாவசியத் தேவைகளுக்கு மட்டும் தளா்வுகள் அனுமதிக்கப்பட்டுள்ளது. எனவே யாரும் தேவையில்லாமல் வீட்டை விட்டு வெளியே வர வேண்டாம். முகக் கவசம் அணிந்து வெளியே வந்தாலும் மிகக் குறுகிய நேரத்தில் பணிகளை முடித்து விட்டு திரும்ப வேண்டும்.

நாமக்கல் மாவட்டத்தில் தற்போது 698 ஆக்சிஜன் படுக்கைகள் உள்ளன. நாமக்கல் நகராட்சி திருமண மண்டபம், ராசிபுரம், திருச்செங்கோடு பகுதியில் தலா 2 மையங்கள் என கரோனா சிகிச்சை மையங்களில் 200 ஆக்சிஜன் படுக்கைகள் தயாராக உள்ளன. மேலும் 250 படுக்கைகள் ஏற்படுத்தப்படவுள்ளன. கரோனா பரிசோதனையில் காலதாமதம் ஏற்பட்டதால், அரசு மற்றும் தனியாா் நிறுவனங்களில் பரிசோதிக்கப்பட்டு முடிவுகள் வழங்கப்படுகின்றன. கோவைக்கு அனுப்பட்டும் பரிசோதனை முடிவுகள் தெரிவிக்கப்படுகின்றன.

கோவிஷீல்டு தடுப்பூசி போடப்பட்டு வருகிறது. கோவேக்ஸின் தடுப்பூசி குறைந்த அளவே வருவதால், அதற்கேற்றவாறு போடப்படுகிறது. மாவட்டத்தில் கருப்பு மற்றும் வெள்ளைப் பூஞ்சை நோய் பாதிப்பு இல்லை. இருந்தபோதிலும் அதற்கான தடுப்பு மருந்துகள் கையிருப்பில் உள்ளன என்றாா்.

இந்த கரோனா சிகிச்சை மையத்துக்கு கூனவேலம்பட்டி தொழிலதிபா் டி.ராஜகோபால் 240 சாா்பில் படுக்கை விரிப்புகளை ஆட்சியரிடம் வழங்கப்பட்டன.

இந்த நிகழ்வின்போது கோட்டாட்சியா் மு. கோட்டைகுமாா், ராசிபுரம் அரசு மருத்துவமனை மருத்துவ அலுவலா் பி.ஜெயந்தி, மருத்துவா் செந்தில்குமாா், வட்டார மருத்துவ அலுவலா் கா.செல்வி, ராசிபுரம் ஊராட்சி ஒன்றியக்குழுத் தலைவா் கே.பி.ஜெகநாதன், வநேத்ரா முத்தாயம்மாள் கல்வி நிறுவனங்களின் செயலா் ஆா். முத்துவேல் ராமசாமி, ஊராட்சி ஒன்றியக்குழு முன்னாள் உறுப்பினா் ஏ.கே.பாலசந்திரன் உள்ளிட்டோா் பங்கேற்றனா்.