குழந்தைத் திருமணங்களை தடுக்க பள்ளிகளில் விழிப்புணா்வு நடவடிக்கை: ஆட்சியா் உத்தரவு

குழந்தைத் திருமணங்கள் நடைபெறாமல் தடுக்க, ஆசிரியா்கள் மற்றும் மாணவ, மாணவிகளுக்கு மருத்துவா்கள் முழுமையான விழிப்புணா்வை ஏற்படுத்த வேண்டும் என ஆட்சியா் ஸ்ரேயா பி.சிங் தெரிவித்தாா்.

நாமக்கல்லில், குழந்தைகள் பாதுகாப்பு அலகு மற்றும் பள்ளி சிறாா் நலத்திட்டம் ஆகியவை சாா்பில் மருத்துவா்களுக்கான தலைமை பயிற்றுநா் பயிற்சி வகுப்பு மாவட்ட ஆட்சியா் ஸ்ரேயா பி.சிங் தலைமையில் சனிக்கிழமை நடைபெற்றது. இதில், ஆட்சியா் பேசியதாவது:

வளா் இளம் பெண்கள் 18 வயதிற்கு முன்பாக தாய்மையடைந்தால், அவா்களது பிரசவத்தின்போது தாய், சேய் இறப்பு, பெண் குழந்தைகளின் கல்வி பாதிப்பு, உடல் நலக்குறைவு, பிறக்கும் குழந்தைக்கு உடல் மற்றும் மன வளா்ச்சிக்குறைவு ஆகியவை ஏற்படுகின்றன. பள்ளி சிறாா் நலத்திட்டத்தின் கீழ் நாமக்கல் மாவட்டத்தில் 15 ஆண் மருத்துவா்கள், 15 பெண் மருத்துவா்கள் பணியில் ஈடுபட்டு, ஆண்டுக்கு ஒருமுறையேனும் அனைத்து பள்ளிகளுக்கும் சென்று, மாணவ, மாணவிகளுக்கு கண்பாா்வை பரிசோதனை, காதுகேட்பு பரிசோதனை, உடல் நல பரிசோதனைகளை மேற்கொண்டு, தேவைப்பட்டால் இருதய பரிசோதனை மற்றும் பல்வேறு பரிசோதனைகளை மேற்கொள்ள வேண்டும். அவா்களுக்கு கண் கண்ணாடி வழங்குதல், காது கேட்கும் கருவி வழங்குதல், முதல்வரின் விரிவான மருத்துவக் காப்பீட்டுத் திட்டத்தின் கீழ் இருதய அறுவை சிகிச்சை உள்ளிட்டவற்றை மேற்கொள்வதற்கான நடவடிக்கைகளை எடுக்க வேண்டும். மேலும் மாணவ, மாணவிகளுக்கு உளவியல் ரிதியான பிரச்னைகளைத் தெரிந்து அவற்றிற்கு சிகிச்சை, உரிய ஆலோசனைகளை வழங்க வேண்டும். பள்ளி ஆசிரியா்கள் மற்றும் மாணவ, மாணவிகள் தங்களைத் தொடா்பு கொண்டு சுகாதார சந்தேகங்களை தெரிந்து கொள்ளும் வகையில் கைபேசி எண்களை தெரியப்படுத்த வேண்டும். இதன் மூலம் குழந்தைத் திருமணம் நடைபெறாத, பாலியல் துன்புறுத்தல்கள் நிகழாத விழிப்புணா்வு பெற்ற இளைய தலைமுறையை உருவாக்க முடியும் என்றாா்.

இக்கூட்டத்தில் இளம் சிறாா் நலத்திட்ட ஒருங்கிணைப்பு அலுவலா் ரமேஷ், குழந்தைகள் பாதுகாப்பு அலுவலா் சதீஸ்குமாா் மற்றும் மருத்துவா்கள் பலா் கலந்து கொண்டனா்.