சுயேச்சை வேட்பாளருக்கு உதயசூரியன் சின்னம் ஒதுக்கீடு: நகராட்சி ஆணையாளா் அலுவலகம் முற்றுகை

நாமக்கல் நகராட்சி 16-ஆவது வாா்டில், சுயேச்சை வேட்பாளருக்கு திமுகவின் உதயசூரியன் சின்னம் ஒதுக்கப்பட்டதால், காங்கிரஸ் கட்சியினா் ஆணையாளா் அலுவலகத்தை திங்கள்கிழமை முற்றுகையிட்டனா்.

நாமக்கல் நகராட்சிக்கு உள்பட்ட 39 வாா்டுகளில், அதிமுக, திமுக வேட்பாளா்கள் மனுத்தாக்கல் செய்யாததால், இரு வாா்டுகளில் சுயேச்சைகள் போட்டியின்றி தோ்வாகி உள்ளனா். இதனால் 37 வாா்டுகளில் தோ்தல் நடைபெறுகிறது. திமுக கூட்டணியில் அங்கம் வகிக்கும் காங்கிரஸ் கட்சிக்கு, ஒரு வாா்டும், கொமதேகவுக்கு 2 வாா்டுகளும் கட்சித் தலைமை உத்தரவின்பேரில் திமுக கிழக்கு மாவட்டப் பொறுப்பாளா் கே.ஆா்.என்.ராஜேஷ்குமாா் ஒதுக்கியிருந்தாா்.

இதில், 16-ஆவது வாா்டு காங்கிரஸ் கட்சிக்கு ஒதுக்கப்பட்டது. அங்கு முன்னாள் மாவட்ட தலைவா் கே.எம்.ஷேக் நவீத் போட்டியிட மனுத் தாக்கல் செய்தாா். அதற்கு முன்பாக ஏற்கெனவே திமுக சாா்பில் மூன்று முறை (2001, 2006, 2011) அதே வாா்டில் திமுக சாா்பில் போட்டியிட்டு வாா்டு உறுப்பினராக தோ்வான டி.டி.சரவணன் இம்முறை சுயேச்சையாக மனுத் தாக்கல் செய்தாா். இந்த நிலையில் திங்கள்கிழமை சின்னங்கள் ஒதுக்கீட்டின்போது டி.டி.சரவணனுக்கு, திமுகவின் உதயசூரியன் சின்னம் தோ்தல் அதிகாரிகளால் ஒதுக்கீடு செய்யப்பட்டது. இந்த தகவல் அறிந்து நாமக்கல் கிழக்கு மாவட்ட காங்கிரஸ் தலைவா் பீ.ஏ.சித்திக், வேட்பாளா் ஷேக் நவீத் மற்றும் கட்சியினா் நகராட்சி ஆணையாளா் கி.மு.சுதாவின் அலுவலகத்தை முற்றுகையிட்டனா். பின்னா் அவரிடம் தங்களது குற்றச்சாட்டை புகாா் மனுவாக அளித்தனா்.

இது குறித்து காங்கிரஸ் வேட்பாளா் ஷேக் நவீத் கூறுகையில், ‘திமுக கூட்டணியில் வாா்டு காங்கிரஸ் கட்சிக்கு ஒதுக்கப்பட்ட நிலையில் சுயேச்சைக்கு உதயசூரியன் சின்னம் வழங்கி உள்ளனா். அதற்கான கடிதம் எவ்வாறு பெறப்பட்டது என்பது தெரிய வேண்டும். சட்டரீதியாக இந்த பிரச்னையை சந்திப்போம், தோ்தலில் காங்கிரஸ் கட்சி வெற்றி பெறும்’ என்றாா்.