நூற்றாண்டைக் கடந்த நிலையிலும் தனியாா் பள்ளிக்கு நிகராக அதிக அளவில் மாணவா்கள் சோ்க்கையுடன் தொடா்ந்து சாதனை படைத்து வருகிறது நாமக்கல் நகரவை தொடக்கப் பள்ளி.
நாமக்கல் கோட்டை சாலையில் கடந்த 1913-ஆம் ஆண்டு ஐந்தாம் வகுப்பு வரையிலான அரசு தொடக்கப் பள்ளி செயல்படத் தொடங்கியது. நாமக்கல்லைச் சுற்றியுள்ள ஏராளமானோா், தற்போது மத்திய, மாநில அரசு பதவிகளில் இருப்போரில் பலரும் இப்பள்ளியில் தான் தங்களது தொடக்க நிலைக் கல்வியை பயின்றனா்.
ஒருங்கிணைந்த சேலம் மாவட்டத்தில், பேரூராட்சி அந்தஸ்தில் இருந்த நாமக்கல் அதன்பிறகு 1970-இல் நகராட்சியாக தரம் உயா்த்தப்பட்டது. அதுவரை ஒன்றியத்தின் கட்டுப்பாட்டில் செயல்பட்ட கோட்டை தொடக்கப் பள்ளியானது, நகரவைப் பள்ளியாக மாற்றம் செய்யப்பட்டது. நகரின் மையப் பகுதியில் அமைந்துள்ளதாலும், அருகிலேயே நகரவை உயா்நிலைப் பள்ளி செயல்படுவதாலும் பெரும்பாலான பெற்றோா் தங்களுடைய குழந்தைகளை இப்பள்ளிகளில் சோ்க்க ஆா்வம் காட்டினா்.
ஊரகப் பகுதிகளில் குறைந்த மாணவா்களுடன் அரசு தொடக்கப் பள்ளிகள் செயல்படும் நிலையில், நகரவைப் பள்ளியில் ஆண்டுதோறும் மாணவா்கள் சோ்க்கை விகிதம் தொடா்ந்து உயா்ந்த வண்ணம் உள்ளது. தமிழகத்தில் அதிகப்படியான மாணவா் சோ்க்கை கொண்ட பள்ளிகளில் பட்டியலில் நாமக்கல் கோட்டை தொடக்கப் பள்ளி முதல் வரிசையில் இடம் பிடித்துள்ளது.
இங்கு, தனியாா் பள்ளிகளுக்கு நிகரான வசதிகள், ஒன்று முதல் 5-ஆம் வகுப்பு வரையில் 16 வகுப்பறைகள் உள்ளன. அதற்கு தகுந்தோற்போல் 16 பெண் ஆசிரியா்கள் மட்டுமே பணியாற்றி வருகின்றனா். அரசு உயா்நிலை, மேல்நிலைப் பள்ளிகளில் தற்போது 700 மாணவ, மாணவியா் படித்து வருகின்றனா். கல்வி, பொழுதுபோக்கு, விளையாட்டு, திறன் வளா்ப்பு, அடிப்படை வசதி, பாதுகாப்பு உள்ளிட்ட அம்சங்கள் இப்பள்ளியில் உள்ளன.
இதுகுறித்து தலைமை ஆசிரியை நிா்மலா கூறியதாவது:
1913-2013-இல் நூறு ஆண்டைக் கடந்த பள்ளியாக நாமக்கல் நகரவை தொடக்கப் பள்ளி பெயா் பெற்றது. அப்போது, செங்கோட்டை வடிவில் பள்ளி முன்பு முகப்பு அமைக்கப்பட்டு திறப்பு விழா காணப்பட்டது. 16 வகுப்பறைகளுடன் 650-க்கும் மேற்பட்ட மாணவ, மாணவியா் படிக்கின்றனா்.
ஒவ்வொரு வகுப்பறையிலும் அரசின் கல்வித் திட்டங்கள் மாணவா்களுக்கு கற்றுக் கொடுக்கப்பட்டு வருகின்றன. தற்போது எண்ணும், எழுத்தும் திட்டத்தை செயல்படுத்தி வருகிறோம். மேலும், ஆங்கில மொழிப் பயிற்சி, திறனறிவுப் போட்டிகள், விளையாட்டுப் போட்டிகளை மாணவா்களுக்கு வழங்கி வருகிறோம். தனியாா் பள்ளியில் மாணவா்களை சோ்க்க பெற்றோா் சிலா் விருப்பம் காட்டுவதால், அதற்கு நிகராக இப்பள்ளியில் உள்ள வசதிகள், கல்வி நிலை குறித்து எடுத்துரைத்து வருகிறோம் என்றாா்.