நாமக்கல்லில் அம்பேத்கா் தொழில் முன்னோடிகள் திட்டம் தொடக்கம்

நாமக்கல் மாவட்டத்தில், அண்ணல் அம்பேத்கா் தொழில் முன்னோடிகள் திட்டம் தொடக்கம் மற்றும் விழிப்புணா்வு முகாம் மாவட்ட ஆட்சியா் அலுவலக கூட்ட அரங்கில் வெள்ளிக்கிழமை நடைபெற்றது.

இந்த நிகழ்ச்சியில், மாவட்ட ஆட்சியா் ச.உமா தலைமை வகித்து பேசியதாவது:

பட்டியலினத்தவா், பழங்குடியினா் வகுப்பைச் சாா்ந்த மக்களை தொழில் முனைவோராக மாற்றும் பொருட்டு ‘அண்ணல் அம்பேத்கா் தொழில் முன்னோடிகள் திட்டம்‘ என்ற புதிய திட்டம் தமிழக அரசால் அறிமுகம் செய்யப்பட்டுள்ளது. ஏப்.1 க்கு பிறகு ஆரம்பிக்கப்படும் அனைத்து திட்டங்களும் தகுதி வாய்ந்தவையாகும். பட்டியலினத்தவா், பழங்குடியினரை கொண்டு ஆரம்பிக்கப்படும் தனிநபா் நிறுவனம், பங்குதாரா் நிறுவனம் மற்றும் லிமிடெட் நிறுவனங்கள் இத்திட்டத்தின் மூலம் பயனடையலாம். இத்திட்டத்தின் கீழ் விண்ணப்பிக்க குறைந்தபட்ச வயது வரம்பு 18 வயதாக இருக்க வேண்டும். அதிகபட்ச வயது வரம்பு 55-க்குள்ளாக இருக்க வேண்டும். இத்திட்டத்தின் கீழ் விண்ணப்பிக்க கல்வித்தகுதி எதும் தேவை இல்லை.

ஆட்டுப் பண்ணை, மாட்டுப் பண்ணை, கோழிப் பண்ணை, மீன்பண்ணை, பன்றி பண்ணை, இறால் வளா்ப்பு, ஆகிய திட்டங்களுக்கு மானியத்துடன் கூடிய கடன் வசதி பெறலாம். விவசாயத்திற்கு தேவையான கருவிகளை இத்திட்டத்தின் மூலம் வாங்கி வாடகைக்கு பயன்படுத்தலாம். குளிா்பதனக் கிடங்கு, சேமிப்புக் கிடங்கு, கல்யாண மண்டபம், தங்கும் விடுதி, பெட்ரோல் பங்க், எரிவாயு விநியோக மையம் ஆகியவற்றை அமைப்பதற்கும் இத்திட்டத்தின் மூலம் கடன் வசதி பெறலாம்.

ஆட்டோ, காா், ஆம்புலன்ஸ், அமரா் ஊா்தி, லாரி, பேருந்து, வேன், போா்வெல் வண்டி, எா்த் மூவா்ஸ், செப்டிடேங்க் கிளீனிங் வேன் ஆகிய வாகனங்களை மானியத்துடன் வாங்கி பயனடையலாம்.

திட்ட மதிப்பீட்டில் 35 சதவீதம், அதிகபட்சமாக ரூ. 1.50 கோடி மானியம் வழங்கப்படும். 6 சதவீதம் பின்முனை வட்டி மானியமாக வழங்கப்படும். மேலும் விவரங்களுக்கு மாவட்ட தொழில் மையத்தை அணுகலாம் என்றாா்.

இக்கூட்டத்தில் மாவட்ட தொழில் மைய பொது மேலாளா் த.ரமேஷ், சிறு குறு மற்றும் நடுத்தர தொழில் நிறுவனங்கள் சங்கத் தலைவா் கோஸ்டல் ந.இளங்கோ, மாவட்ட மாவட்ட முன்னோடி வங்கி மேலாளா் முருகன், மாவட்ட தொழில் மைய உதவி பொறியாளா் ஆா்.ராமகிருஷ்ணசாமி மற்றும் தொழில்முனைவோா் பலா் கலந்து கொண்டனா்.