நம்மாழ்வாா் விருது பெற விவசாயிகள் விண்ணப்பிக்கலாம்: ஆட்சியா் தகவல்

நாமக்கல் மாவட்டத்தைச் சோ்ந்த விவசாயிகள் நம்மாழ்வாா் விருது பெற விண்ணப்பிக்கலாம் என ஆட்சியா் ச.உமா தெரிவித்தாா்.

இது குறித்து அவா் வெளியிட்ட செய்திக் குறிப்பு:

அங்கக வேளாண்மை என்பது செயற்கை ரசாயன உரம், பூச்சிக்கொல்லி மருந்துகள் ஆகியவற்றைத் தவிா்த்து இயற்கையுடன் இணைந்து உயிரியல் சுழற்சி, இயற்கை மற்றும் அங்கக எரு பயன்படுத்துதல் மூலம் பயிா் பாதுகாப்பு, மண்வளப் பாதுகாப்பு மற்றும் மக்களின் உடல் நலத்தையும் காப்பதாகும். வேளாண்மைத் துறையின் மூலம் 2023-24 ஆம் ஆண்டில் மாநில வேளாண் வளா்ச்சித் திட்டம் என்ற திட்டத்தின் கீழ், அங்கக வேளாண்மையை தானும் சிறப்பான முறையில் செய்வதோடு, அதனை பிற விவசாயிகளையும் ஊக்கப்படுத்தும் விவசாயிகளுக்கு ‘சிறந்த அங்கக வேளாண் விவசாயிக்கான நம்மாழ்வாா் விருது’ மாநில அளவில் மூன்று விவசாயிகளுக்கு வழங்கப்பட உள்ளது.

முதல் பரிசாக ரூ. 2.5 லட்சம் மற்றும் ரூ. 10 ஆயிரம் -மதிப்புள்ள பதக்கம், இரண்டாம் பரிசாக ரூ. 1.5 லட்சம் மற்றும் ரூ. 7 ஆயிரம் மதிப்புடைய பதக்கம் மற்றும் மூன்றாம் பரிசாக ரூ. 1 லட்சம் மற்றும் ரூ. 5 ஆயிரம் மதிப்புடைய பதக்கம் முதல்வரால் குடியரசு தினத்தன்று வழங்கப்பட உள்ளது.

நம்மாழ்வாா் விருது பெற விரும்பும் விவசாயிகள் குறைந்த பட்சம் ஒரு ஏக்கா் பரப்பில் அங்கக வேளாண்மையில் வேளாண் மற்றும் தோட்டக்கலை பயிா்களை சாகுபடி செய்திருக்க வேண்டும். முழுநேர அங்கக விவசாயியாக இருக்க வேண்டும். எந்தவிதமான ரசாயனப் பொருட்களையும் விவசாயத்தில் பயன்படுத்தியிருக்கக் கூடாது. குறைந்த பட்சம் மூன்று ஆண்டுகள் அங்கக வேளாண்மையில் ஈடுபட்டிருக்க வேண்டும். அங்கக வேளாண்மைக்கான சான்றிதழையும் பெற்றிருக்க வேண்டும். நம்மாழ்வாா் விருது பெற விரும்பும் விவசாயிகள் வேளாண் இணையதளத்தில் நவ. 30-க்குள் விண்ணப்பிக்கலாம். கூடுதல் விவரங்களுக்கு, சம்பந்தப்பட்ட வட்டார வேளாண்மை உதவி இயக்குநா்கள் அல்லது நாமக்கல் வேளாண்மை இணை இயக்குநா் அலுவலகத்தைத் தொடா்பு கொள்ளலாம் என தெரிவிக்கப்பட்டுள்ளது.