தமிழகத்தில் அரசியல் மாற்றத்தைமக்கள் விரும்புகின்றனா்: கே. அண்ணாமலை

தமிழகத்தில் அரசியல் மாற்றத்தை மக்கள் விரும்புகின்றனா் என பாஜக மாநிலத் தலைவா் கே.அண்ணாமலை தெரிவித்தாா்.

நாமக்கல் சட்டப்பேரவை தொகுதியில், ‘என் மண், என் மக்கள்’

யாத்திரையை, பாஜக தலைவா் கே. அண்ணாமலை சனிக்கிழமை மேற்கொண்டாா்.

நாமக்கல் - சேலம் சாலையில் உள்ள நான்கு திரையரங்கு பகுதியில், மாலை 4 மணியளவில் தொடங்கிய யாத்திரை, பேருந்து நிலையம் முன்பாக 6 மணிக்கு நிறைவடைந்தது.

அங்கு, பாஜக மாநிலத் தலைவா் கே.அண்ணாமலை பேசியதாவது:

இந்த யாத்திரை 88 ஆவது தொகுதியாக நாமக்கல்லில் நடைபெறுகிறது. தேசியமும், தெய்வீகமும் நிறைந்த மண்ணாக நாமக்கல் விளங்குகிறது. சந்திரயான் திட்டத்துக்கு சோதனைக்கான மண்ணை எடுத்தது நாமக்கல் பகுதியில் இருந்துதான். பிரதமா் நரேந்திர மோடி மனதின் குரல் நிகழ்ச்சியின் போது, நாமக்கல் என்றால் நினைவிற்கு வருவது ஆஞ்சனேய சுவாமியும், சிபிஎஸ்இ தோ்வில் முதன்மையிடம் பிடித்த மாணவி கனிகாவும் தான் என்றாா்.

சாதாரண மனிதன் உயா் பதவிக்கு வருவது தான் ஜனநாயகத்திற்கு அழகு. ஒரே குடும்பத்தில் இருப்பவா்கள் உயா் பதவிக்கு வருவது அழகல்ல. அந்த வகையில் எளிய குடும்பத்தில் பிறந்து, தற்போது பிரதமா் மோடியின் மந்திரி சபையில் உள்ள 78 அமைச்சா்களில் ஒருவராக மத்திய இணை அமைச்சா் எல்.முருகன் உள்ளாா். தமிழகத்தில் ஊழல் மிகுந்த ஆட்சியை திமுக நடத்தி வருகிறது. முதல்வா் மு.க.ஸ்டாலின், ஆரியத்திற்கு தான் நான் எதிரி, ஆன்மிகத்துக்கு எதிரி அல்ல என்கிறாா்.

நாமக்கல் கவிஞா் தனது புத்தகத்தில், தமிழகத்தில் ஆரியமும் இல்லை, திராவிடமும் இல்லை என தெரிவித்துள்ளாா். ஆரியம், திராவிடம் இரண்டுமே மாயைத் தான் என கவிஞா் தனது புத்தகத்தில் குறிப்பிட்டுள்ளாா்.

நாமக்கல் நகராட்சி புதிய பேருந்து நிலையத்துக்கு கருணாநிதி பெயரைச் சூட்டுவது என நகா்மன்றக் கூட்டத்தில் தீா்மானம் நிறைவேற்றியுள்ளனா். எங்கு பாா்த்தாலும் கருணாநிதி, அண்ணா, அன்பழகன் பெயா் இடம் பெற்றுள்ளதே, அதற்கு மாற்றாக தீரன் சின்னமலை, கவிஞா் இராமலிங்கம், தியாகி டி.எம்.காளியண்ண கவுண்டா் ஆகியோரில் ஒருவரது பெயரை இடம்பெறச் செய்யலாம்.

பிரதமா் மோடி தமிழகத்திற்கு உச்சகட்ட மரியாதை வழங்கி வருகிறாா். புதிய நாடாளுமன்றக் கட்டடத்தில் செங்கோலை நிறுவி தமிழகத்தின் பெருமையை மேம்படுத்தினாா். தொடா்ந்து தமிழ் கலாசாரத்துக்கு முக்கியத்துவம் அளித்து வருகிறாா். வளா்ச்சி அடிப்படையில், கடந்த 9 ஆண்டுகளில் தமிழகத்திற்கு ரூ. 10.76 லட்சம் கோடி நிதி ஒதுக்கீடு செய்துள்ளாா். இதைப்பற்றி எல்லாம் அவா் பேசுவதில்லை.

விந்திய மலைக்கு மேலே இருப்பவா்கள் எல்லாம் ஆரியன் என்கிறது திமுக அரசு. அவ்வாறு இருக்கையில் இந்தியா கூட்டணியில் இடம் பெற்றுள்ள நிதீஷ்குமாா் முதல் ராகுல் காந்தி வரை அனைவரும் ஆரியா்கள் தான். அந்தக் கூட்டணியில் இருந்து வெளியே வர முடியுமா?. 2024 இல் மக்களவைத் தோ்தலில் வரும் சூழலில் ஆரியம், திராவிடம் குறித்து பேசி திமுக அரசு ஆதாயம் தேட முயற்சிக்கிறது. காவிரியில் தண்ணீா் வரவில்லை என்றால் முதல்வா் தங்களுடைய கூட்டணியில் உள்ள அம்மாநில காங்கிரஸ் அரசைக் கேட்காமல், பிரதமருக்கு கடிதம் எழுதுகிறாா். அதேபோல நீட் தோ்வு வேண்டாம் என்றால் உச்ச நீதிமன்றத்தை நாட வேண்டியது தானே? அதை விடுத்து குடியரசுத் தலைவருக்கு கடிதம் அனுப்பும் முயற்சியை மேற்கொண்டுள்ளனா். இவையெல்லாம் மக்களை ஏமாற்றுவதற்கான திட்டமாகும்.

ஜனவரி 2-ஆவது வாரம் வரையில் என் மண் என் மக்கள் யாத்திரை நடைபெற இருக்கிறது. இந்த யாத்திரைக்கு திரண்டு வரும் கூட்டத்தை பாா்க்கும் போது தமிழகத்தில் அரசியல் மாற்றத்தை மக்கள் விரும்ப தொடங்கி விட்டது தெரிய வருகிறது என்றாா்.

முன்னதாக, இந்த யாத்திரையில்

மத்திய இணை அமைச்சா் எல்.முருகன், பாஜக மாநில துணைத் தலைவா்கள் கே.பி. ராமலிங்கம், வி.பி. துரைசாமி, நாமக்கல் கிழக்கு மாவட்ட நிா்வாகிகள் கலந்து கொண்டனா்.