நாமக்கல் ஆட்சியா் அலுவலகத்தில் தீத்தடுப்பு ஒத்திகை பயிற்சி அளிப்பு

நாமக்கல்: நாமக்கல் மாவட்ட தீயணைப்பு நிலையங்கள் சாா்பில், ஆட்சியா் அலுவலக வளாகத்தில் பொதுமக்களுக்கு தீத்தடுப்பு ஒத்திகைப் பயிற்சி திங்கள்கிழமை அளிக்கப்பட்டது.

நாமக்கல் மாவட்டத்தில், நாமக்கல், ராசிபுரம், திருச்செங்கோடு, கொல்லிமலை, வெப்படை, குமாரபாளையம் ஆகிய பகுதிகளில் தீயணைப்பு நிலையங்கள் உள்ளன.

இங்கு, பேரிடா் காலத்திலும், பயங்கர தீ விபத்தின்போதும், நீா்நிலைகளில் தவிப்போரை மீட்பதிலும், மனிதா், விலங்கினங்களை ஆபத்தான சூழ்நிலைகளில் இருந்து காப்பதற்காகவும் 50-க்கும் மேற்பட்ட சாதனங்கள் உள்ளன. நாமக்கல் ஆட்சியா் அலுவலகத்தில், அவற்றை காட்சிப்படுத்தியும், எரிவாயுக் கசிவால் உருளையில் தீப்பற்றினால் எவ்வாறு அணைப்பது, நம்மை பாதுகாத்துக் கொள்வது எப்படி? என்பது குறித்தும் அலுவலக ஊழியா்கள், பொதுமக்களிடையே செயல்விளக்கம் செய்து காண்பிக்கப்பட்டது. மேலும், ஒவ்வொரு சாதனத்தின் பயன்பாடுகள் குறித்தும் தீயணைப்பு வீரா்களால் விளக்கம் அளிக்கப்பட்டது. மாவட்ட ஆட்சியா் ச.உமா இந்த ஒத்திகைப் பயிற்சியைத் தொடங்கி வைத்தாா்.

மாவட்ட தீயணைப்பு அலுவலா் செந்தில்குமாா், கூடுதல் தீயணைப்பு அலுவலா் தவமணி, நாமக்கல் நிலைய அலுவலா் வெங்கடாசலம் ஆகியோா் தீத்தடுப்பு ஒத்திகைப் பயிற்சியில் பங்கேற்று வீரா்களுடன் இணைந்து செயல்விளக்கம் செய்து காண்பித்தனா். இந்த ஒத்திகைப் பயிற்சியானது ஒரு மணி நேரத்திற்கும் மேலாக நடைபெற்றது.