மேட்டூர் அணை பூங்காவில் சுற்றுலாப் பயணிகள் குவிந்தனர்

மேட்டூர் அணை பூங்காவில் ஞாயிற்றுக்கிழமை சுற்றுலாப் பயணிகள் குவிந்தனர். 
தொடர் விடுமுறை என்பதால் மேட்டூருக்கு ஞாயிற்றுக்கிழமை வழக்கத்தைவிட  அதிகளவிலான பார்வையாளர்கள் வந்து சென்றனர். கடந்த வெள்ளிக்கிழமை ஆடிப் பெருக்கு பண்டிகை கொண்டாடப்பட்டதால்  அணைக்கட்டு முனியப்பன் சுவாமிக்கு ஆடு,  கோழி பலியிடும் பொதுமக்கள் அதிக அளவில் வரவில்லை. இந்த நிலையில் ஞாயிற்றுக்கிழமை ஆடு, கோழிகளை பலியிடுவதற்கு ஏராளமானோர் குடும்பத்தினருடன் வந்து சென்றனர்.  அணைக்கட்டு முனியப்பன் சுவாமிக்கு பொங்கலிட்டு தங்களின் நேர்த்திக் கடனை செலுத்திவிட்டு பக்தர்கள் மேட்டூர் அணை பூங்காவுக்கு சென்று பார்வையிட்டனர்.  அணை பூங்காவை பார்வையிட்ட சிறுவர்களும், பெரியவர்களும் ஊஞ்சலாடியும், சறுக்கி விளையாடியும் மகிழ்ந்தனர். ஞாயிற்றுக்கிழமை ஒரே நாளில் மட்டும்  21 ஆயிரம் பேர் அணை பூங்காவுக்கு வந்து  பார்வையிட்டு சென்றுள்ளனர். இதன் முலம் பார்வையாளர் கட்டணமாக ரூ.1,05,000  வசூலாகியுள்ளது.