கோட்டை பகுதியில் 5 இருசக்கர வாகனங்களுக்கு தீ வைப்பு

சேலம் கோட்டை பகுதியில் தெருவில் நிறுத்தியிருந்த 5 இருசக்கர வாகனங்களுக்கு தீ வைத்த மர்ம நபர்களை போலீஸார் தேடி வருகின்றனர்.
சேலம் டவுன் கோட்டை பகுதியில் வெங்கிடசாமி தெரு மற்றும் சின்னசாமி தெருவில் ஏராளமானோர் குடியிருந்து வருகின்றனர். இப்பகுதியில் குடியிருப்பவர்கள் தங்களது இருசக்கர வாகனங்களை சாலை ஓரத்தில் நிறுத்தி வைப்பது வழக்கம். இந்நிலையில், திங்கள்கிழமை அதிகாலை தெருவில் நிறுத்தி இருந்த 5 இருசக்கர வாகனங்களுக்கு  மர்ம நபர்கள் தீ வைத்துவிட்டு தப்பி ஓடியதாகத் தெரிகிறது. இதனிடையே  தீ விபத்தை அறிந்த அக்கம் பக்கத்தினர் ஓடி வந்து தீயை அணைத்தனர். இது தொடர்பாக, சேலம் டவுன் காவல் நிலையப் போலீஸாருக்கு தகவல் தெரிவித்ததையடுத்து, அவர்கள் இதுகுறித்து விசாரணை நடத்தி வருகின்றனர்.