கொங்கணாபுரத்தில் பருத்தி ரூ. 2.10 கோடிக்கு விற்பனை

கொங்கணாபுரம் வேளாண் கூட்டுறவு விற்பனை மையத்தில் வெள்ளிக்கிழமை நடைபெற்ற பருத்தி ஏலத்தில் ரூ. 2.10 கோடிக்கு பருத்தி மூட்டைகள் ஏலம் போனது.

இம்மையத்தில் வாரந்தோறும் வெள்ளி, சனிக்கிழமைகளில் பருத்தி, நிலக்கடலை, எள், கொப்பரைத் தேங்காய் ஆகியவற்றுக்கு ஏலம் நடைபெறுகிறது. நிகழ்வாரம் விவசாயிகள் கொண்டுவந்த சுமாா் 5,000 பருத்தி மூட்டைகள் 900 லாட்டுகளாக பிரிக்கப்பட்டு ஏலம் விடப்பட்டது. இதில் பி.டி. ரக பருத்தி குவிண்டால் ஒன்று ரூ. 9,700 முதல் ரூ. 11,150 வரைக்கும், டி.சி.ஹெச் ரக பருத்தி குவிண்டால் ஒன்று ரூ. 10,050 முதல் ரூ. 12,799 வரைக்கும் விலைபோனது. மொத்தம் ரூ. 2 கோடியே 10 லட்சத்துக்கு பருத்தி மூட்டைகள் விற்பனையாகின. சனிக்கிழமையும் பருத்தி ஏலம் நடைபெறவுள்ளது. நிகழ்வாரம் ஏலத்துக்கு 110 மூட்டை கொப்பரைத் தேங்காய் கொண்டு வரப்பட்டிருந்தன.

அவை 40 லாட்டுகளாகப் பிரிக்கப்பட்டு பொது ஏலம் விடப்பட்டது. இதில் முதல் தரம் கிலோ ரூ. 81. 65 காசு முதல் ரூ. 88. 35 காசு வரை விற்பனையானது. இரண்டாம் தரம் ரூ. 66.40 காசு முதல் ரூ. 80. 85 காசு வரை விற்பனையானது. பொது ஏலத்தின் மூலம் ரூ. 4 லட்சம் வரை கொப்பரைத் தேங்காய் விற்பனையானது. கொப்பரைத் தேங்காய்க்கு அடுத்த ஏலம் பிப். 18- ஆம் தேதி நடைபெறும் என கூட்டுறவுத் துறை அதிகாரிகள் தெரிவித்தனா்.