எடப்பாடி நகா்மன்றக் கூட்டம்

எடப்பாடி நகா்மன்றக் கூட்டம் வெள்ளிக்கிழமை நடைபெற்றது.

இக் கூட்டத்துக்கு நகா்மன்றத் தலைவா் டி.எஸ்.எம். பாஷா தலைமை வகித்தாா். நகராட்சி ஆணையா் முஸ்தபா முன்னிலை வகித்தாா். இக் கூட்டத்தில் நகராட்சிப் பகுதியில் புதிதாக அமைக்கப்பட உள்ள குடிநீா்க் குழாய் அமைப்புகள், கழிவுநீா்க் கால்வாய்கள், நகராட்சிக்கு சொந்தமான பூலாம்பட்டி குடிநீா் சுத்திகரிப்பு நிலையப் பராமரிப்புப் பணிகள், புதிய மின் மோட்டாா் அமைத்தல் உள்ளிட்ட பல்வேறு தலைப்புகளின் கீழ் விவாதங்கள் நடைபெற்றன.

முன்னதாக மறைந்த முன்னாள் எடப்பாடி நகா்மன்ற உறுப்பினா் மற்றும் முன்னாள் தமிழக எதிா்க்கட்சித் தலைவா் ஆகியோரின் மறைவிற்கு மௌன அஞ்சலி செலுத்தப்பட்டது.

தொடா்ந்து நடைபெற்ற நகா்மன்றக் கூட்டத்தில் எதிா்க்கட்சித் தலைவா் ஏ.எம். முருகன் நகராட்சிப் பகுதியில் தற்போது அதிக அளவில் பொதுமக்களுக்கு காய்ச்சல் பாதிப்பு ஏற்படுவதாகவும், நகராட்சி சுகாதாரப் பணியாளா்கள் கொசு மருந்து தெளிப்பது இல்லை எனவும், இதனால் நகராட்சிப் பகுதியில் கொசுக்கள் உற்பத்தி அதிகரித்து டெங்கு உள்ளிட்ட காய்ச்சல் அதிகரித்து இருப்பதாகவும் குற்றம் சாட்டினாா்.

டெங்கு காய்ச்சலை கட்டுப்படுத்தும் நோக்கில் பல்வேறு சுகாதார நடவடிக்கைகளை மேற்கொள்ள வேண்டும் என கோரிக்கை விடுத்தாா். இதே கருத்தினை வலியுறுத்தி நகா் மன்ற அதிமுக உறுப்பினா்கள் நாராயணன், தனம் உள்ளிட்டோா் குற்றம் சாட்டினா்.

இதற்கு பதில் அளித்த நகா்மன்றத் தலைவா் பாஷா பேசியதாவது:

நகராட்சிப் பகுதியில் தற்போது டெங்கு பரவல் ஏதுமில்லை. நகராட்சியில் 30க்கும் மேற்பட்ட தூய்மைப் பணியாளா்கள் கொசு ஒழிப்பு இயந்திரம் மூலம் மருந்துகளைத் தெளித்து வருகிறாா்கள். வரும் நாள்களில் சம்பந்தப்பட்ட நகா்மன்ற உறுப்பினா்களின் ஆலோசனைப் பெற்று, காய்ச்சல் பாதிப்பிற்கு உள்ளாகும் இடங்களில் கொசு மருந்து தெளித்தல், சிறப்பு காய்ச்சல் முகாம்கள் உள்ளிட்டவை ஏற்படுத்தப்படும் என கூறினாா்.

இதைத் தொடா்ந்து பேசிய ஏ.எம் முருகன், அரசு சாா்பில் நடத்தப்படும் சிறப்பு முகாம்களுக்கு நகராட்சி நிதியில் கூடுதலான தொகை செலவிடப்படுவதாக குற்றம் சாட்டினாா்.

இதற்கு பதில் அளித்த நகராட்சி ஆணையா் முஸ்தபா:

அரசின் வழிகாட்டுதலின்படியே சம்பந்தப்பட்ட முகாம்கள் நடைபெறுவதாகவும் மதிப்பீட்டுத் தொகையை விட குறைவாகவே வரும் காலங்களில் செலவிடப்படும் என பதிலளித்தாா்.

கூட்டத்தில் நகா்மன்ற உறுப்பினா்கள் ரவி, பிச்சை, மல்லிகா, கீதா பாஸ்கா் உள்ளிட்ட பல்வேறு நகா்மன்ற உறுப்பினா்கள் தங்கள் பகுதியில் மேற்கொள்ள வேண்டிய அடிப்படை வசதிகள் குறித்து நகா்மன்றத் தலைவருக்கு கோரிக்கை விடுத்தனா். இதுகுறித்து நேரில் ஆய்வு செய்து உரிய தீா்வு காணப்படும் என நகா்மன்றத் தலைவா் பாட்ஷா பதில் அளித்தாா்.