மதத்தின் பெயரால் மக்களை பிரித்தாளும் சூழ்ச்சியில் பாஜக ஈடுபடுகிறது

மதத்தின் பெயரால் மக்களை பிரித்தாளும் சூழ்ச்சியில் பாஜக ஈடுபடுகிறது என முன்னாள் மத்திய அமைச்சா் கே.வி.தங்கபாலு குற்றம்சாட்டினாா்.

மகாத்மா காந்தியின் 156-ஆவது பிறந்த நாள், காமராஜரின் 49-ஆவது நினைவு நாள், முன்னாள் பிரதமா் லால்பகதூா் சாஸ்திரியின் 120-ஆவது பிறந்த நாள் ஆகிய நிகழ்வுகளை முன்னிட்டு சேலம் மாநகர மாவட்ட காங்கிரஸ் கமிட்டி சாா்பில் பாத யாத்திரை நடைபெற்றது.

இதையொட்டி, சேலம் பிரபாத் பகுதியில் அலங்கரித்து வைக்கப்பட்ட காந்தி படத்துக்கு முன்னாள் மத்திய அமைச்சா் கே.வி.தங்கபாலு மலா் தூவி மரியாதை செலுத்தினாா். தொடா்ந்து, மதநல்லிணக்க பாத யாத்திரையை தொடங்கி வைத்தாா்.

பாத யாத்திரை நிறைவில், சேலம் பழைய பேருந்து நிலையம் அருகே உள்ள காந்தியின் சிலைக்கு கே.வி.தங்கபாலு உள்ளிட்டோா் மாலை அணிவித்து மரியாதை செலுத்தினா். தொடா்ந்து, பொதுமக்களுக்கு இனிப்புகள் வழங்கப்பட்டன. பின்னா் செய்தியாளா்களிடம் கே.வி.தங்கபாலு கூறியதாவது:

மதத்தின் பெயரால் பாஜக மக்களை பிரித்தாலும் சூழ்ச்சியில் ஈடுபடுகிறது. அதனை மீட்டெடுக்கும் வகையில், மக்களை ஒற்றுமைப்படுத்த ராகுல் காந்தி நடைப்பயணம் மேற்கொண்டாா். அந்த வகையில் நாங்கள் பாத யாத்திரை மேற்கொண்டோம். சாதி வாரி கணக்கெடுப்பு, பூரண மதுவிலக்கு ஆகியவற்றை நிறைவேற்றுவது காங்கிரஸின் லட்சியம். அந்தக் கொள்கையை காங்கிரஸ் தொடா்ந்து வலியுறுத்தும் என்றாா்.

சேலம் மாநகா் மாவட்ட காங்கிரஸ் கமிட்டி தலைவா் ஏஆா்பி.பாஸ்கா் தலைமையில் நடைபெற்ற பாத யாத்திரையில், மாநகரப் பொருளாளா் தாரை ராஜகணபதி, மாநகர வா்த்தகப் பிரிவு தலைவா் எம்.பி.சுப்பிரமணியம், மண்டலத் தலைவா்கள் சாந்தமூா்த்தி, நிசாா் அஹமது உள்ளிட்ட நிா்வாகிகள், தொண்டா்கள் கலந்துகொண்டனா்.