சங்ககிரி அருகே லாரி ஓட்டுநா் வீட்டில் 23 பவுன் தங்க நகைகள் திருட்டு

சேலம் மாவட்டம், சங்ககிரி அருகே லாரி ஓட்டுநா் வீட்டில் பீரோவில் வைக்கப்பட்டிருந்த 23 பவுன் தங்க நகைகளை மா்ம நபா்கள் திருடிச் சென்றது குறித்து போலீஸாா் விசாரணை நடத்தி வருகின்றனா்.

சங்ககிரியை அடுத்த சத்யா நகா் பகுதியில் வசித்து வருபவா் குப்புசாமி மகன் பழனிவேல் (47). இவா் சங்ககிரி லாரி உரிமையாளா்கள் சங்கத்தில் ஓட்டுநராகப் பணியாற்றி வருகிறாா். இவருக்கு செல்லம்மாள் என்ற மனைவியும், தனஸ்ரீ என்ற மகளும் உள்ளனா்.

இந்நிலையில் வியாழக்கிழமை பழனிவேல் வேலைக்கு சென்றுள்ளாா். அவரது மனைவி வீட்டை பூட்டிவிட்டு அவரது தோழி வீட்டிற்கு சென்றுள்ளாா். இரவில் செல்லம்மாள் குழந்தையுடன் வீடுதிரும்பியபோது, பீரோவில் வைக்கப்பட்டிருந்த 23 பவுன் தங்க நகைகள் திருடப்பட்டிருந்தது தெரியவந்தது.

இதுகுறித்து பழனிவேல் சங்ககிரி காவல் நிலையத்தில் புகாா் அளித்தாா். அதன்பேரில் போலீஸாா் வழக்குப் பதிவுசெய்து, தடயவியல் நிபுணா்களை வரவழைத்து தடயங்களை சேகரித்தனா். மேலும், அப்பகுதியில் உள்ள சிசிடிவி கேமரா பதிவுகள் அடிப்படையில் விசாரித்து வருகின்றனா்.