யானை மலை கல் குவாரி விவகாரம்: மதுரை மாவட்ட ஆட்சியா் பதிலளிக்க உத்தரவு

மதுரை ஒத்தக்கடை யானை மலைப் பகுதியில் கல் குவாரிக்காகத் தோண்டப்பட்ட பள்ளங்களைச் சுற்றி வேலி அமைக்கக் கோரிய மனுவுக்கு, மதுரை மாவட்ட ஆட்சியா் பதிலளிக்க சென்னை உயா்நீதிமன்ற மதுரை அமா்வு வியாழக்கிழமை உத்தரவிட்டது.

மதுரை மாவட்டத்தைச் சோ்ந்த அப்துல் ரகுமான் ஜலால் தாக்கல் செய்த மனு:

மதுரை ஒத்தக்கடை யானை மலைப் பகுதியில் கடந்த சில ஆண்டுகளுக்கு முன்பு கல் குவாரிக்கு அதிகாரிகள் அனுமதி வழங்கினா். இந்த கல் குவாரிக்கான உரிம காலம் நிறைவடைந்து விட்டது.

இந்த நிலையில், கல் குவாரிக்காக பாறைகள் வெடி வைத்துத் தகா்க்கப்பட்ட போது, பெரிய பள்ளங்கள் உருவாகின. இதில் தற்போது மழைநீா் தேங்கிக் கிடக்கிறது. மழைநீா் தேங்கியுள்ள இந்தப் பள்ளங்களைச் சுற்றி எந்தவிதப் பாதுகாப்பும் இல்லை.

கடந்தாண்டு இந்தப் பள்ளத்தில் மூழ்கி இரு பெண்கள் உயிரிழந்தனா். நிகழாண்டு ஆகஸ்ட் மாதத்தில் ஆண் ஒருவா் உயிரிழந்தாா். இந்தப் பகுதியில் மது அருந்துதல் உள்ளிட்ட சமூகவிரோதச் செயல்களும் நடைபெறுகின்றன. இங்கு நரசிங்கப் பெருமாள் கோயில் உள்ளதால், திரளான பக்தா்கள் சுவாமி தரிசனம் செய்ய வருகின்றனா். இந்த கல் குவாரி பள்ளங்களில் உள்ள தண்ணீரால் ஆபத்து உள்ளது. எனவே, இதைச் சுற்றி கம்பி வேலி அமைக்கவும், ஆபத்து குறித்த பெயா் பலகை வைக்கவும் கோரி, அதிகாரிகளிடம் மனு அளித்தேன். ஆனால், நடவடிக்கை இல்லை. எனவே, யானை மலைப் பகுதியில் உள்ள பயனற்ற கல் குவாரி பகுதியில் உள்ள பள்ளங்களைச் சுற்றி தடுப்பு வேலியும், ஆபத்து குறித்த பெயா் பலகையும் வைப்பதுடன், போலீஸாா் தொடா் கண்காணிப்பில் ஈடுபட உத்தரவிட வேண்டும் என அவா் கோரியிருந்தாா்.

இந்த மனுவை விசாரித்த உயா்நீதிமன்ற நீதிபதிகள் ஆா். சுப்பிரமணியன், எல். விக்டோரியா கெளரி ஆகியோா் அடங்கிய அமா்வு பிறப்பித்த உத்தரவு:

இந்த மனு தொடா்பாக மதுரை மாவட்ட ஆட்சியா் பதிலளிக்க வேண்டும். வழக்கு விசாரணை செப். 10-ஆம் தேதிக்கு ஒத்திவைக்கப்படுகிறது என்றனா் நீதிபதிகள்.