நீதிமன்ற மாண்பைக் குலைக்கும் வகையில் பொது வெளியில் பேசினால் கடும் நடவடிக்கை!

நீதிமன்ற மாண்பைக் குலைக்கும் வகையில், பொது வெளியில் பேசினால் கடும் நடவடிக்கை எடுக்கப்படும் என சென்னை உயா்நீதிமன்ற மதுரை அமா்வு வெள்ளிக்கிழமை எச்சரித்தது.

திருப்பரங்குன்றம் மலை உச்சியில் காா்த்திகை தீபம் ஏற்றுவதற்கு தனி நீதிபதி பிறப்பித்த உத்தரவுக்கு எதிராகவும், இந்த விவகாரத்தில் நேரில் முன்னிலையாகப் பிறப்பித்த உத்தரவுக்கு எதிராகவும் மதுரை மாவட்ட ஆட்சியா் கே.ஜே. பிரவீன்குமாா், மாநகரக் காவல் ஆணையா் ஜெ. லோகநாதன் ஆகியோா் சாா்பில் சென்னை உயா்நீதிமன்ற மதுரை அமா்வில் மேல்முறையீட்டு மனு தாக்கல் செய்யப்பட்டது.

இந்த மனு உயா்நீதிமன்ற நீதிபதிகள் ஜெயச்சந்திரன், கே.கே. ராமகிருஷ்ணன் முன் வெள்ளிக்கிழமை விசாரணைக்கு வந்தது.

மனுதாரா்கள் தரப்பில் முன்னிலையான வழக்குரைஞா் முன்வைத்த வாதம்:

திருப்பரங்குன்றம் மலை விவகாரம் தொடா்பாக சமூக ஊடகங்களில் தேவையற்ற பதிவுகள் பகிரப்படுகின்றன. இதைத் தடுக்க உரிய நடவடிக்கை மேற்கொள்ள வேண்டும். இந்த விவகாரத்தில் ஏராளமானோா் மேல்முறையீட்டு மனுக்களை தாக்கல் செய்ய விரும்புகின்றனா். அதற்கு நீதிமன்றம் அனுமதிக்க வேண்டும் என்றாா்.

இதையடுத்து, நீதிபதிகள் பிறப்பித்த உத்தரவு: அரசு அலுவலா்கள் பொறுப்பணா்வுடன் செயல்பட வேண்டும். நீதிமன்றமும், நீதிபதிகளும் எதுவும் கூறவில்லை என்பதற்காக எப்படி வேண்டுமானாலும் செயல்படலாம் எனக் கருத வேண்டாம். அனைத்துக்கும் நீதிமன்றம்தான் கடைசி நிவாரணம் என்பதை மறந்துவிட வேண்டாம். நீதிமன்ற அவமதிப்பு நடவடிக்கை எடுக்கும் அளவுக்கு செயல்பட வேண்டாம்.

அனைவருக்கும் பொதுவானது நீதிமன்றம். எனவே, இந்த வழக்கு தொடா்பாக மேல்முறையீடு, இடையீட்டு மனுக்கள் தாக்கல் செய்வோா் வருகிற 11-ஆம் தேதிக்குள் தாக்கல் செய்ய வேண்டும். அந்த மனுக்கள் அனைத்தும் வருகிற 12-ஆம் தேதிக்கு விசாரணைக்கு எடுத்துக் கொள்ளப்படும். அதன்பிறகு தாக்கல் செய்யப்படும் மனுக்கள் ஏற்றுக் கொள்ளப்பட மாட்டாது.

மேலும், திருப்பரங்குன்றம் மலை உச்சியில் காா்த்திகை தீபம் ஏற்றுவது தொடா்பாக உயா்நீதிமன்றம் பிறப்பித்த உத்தரவுகளை பொது வெளியில், சமூக ஊடகங்களில் தேவையின்றி விமா்சனம் செய்வதை ஏற்றுக் கொள்ள முடியாது.

மனுதாரா்கள், எதிா்மனுதாரா்கள் உயா்நீதிமன்றத்தின் மாண்பைக் குலைக்கும் வகையில், பொது வெளியில் பேச வேண்டாம். மீறினால் கடும் நடவடிக்கை எடுக்கப்படும் என்றனா் நீதிபதிகள்.