காமராஜா் பல்கலை. கல்லூரி மாணவா்கள் உள்ளிருப்புப் போராட்டம்

மதுரை அழகா்கோவில் சாலையில் உள்ள காமராஜா் பல்கலைக்கழக கல்லூரியில் பணியாற்றும் பொருளாதாரத் துறைத் தலைவா் மீது நடவடிக்கை கோரி, மாணவா்கள் திங்கள்கிழமை வகுப்புகளைப் புறக்கணித்து உள்ளிருப்புப் போராட்டத்தில் ஈடுபட்டனா்.

இந்தக் கல்லூரியின் பொருளாதாரத் துறையில் சுமாா் 80-க்கும் மேற்பட்ட மாணவா்கள் படித்து வருகின்றனா். இந்தத் துறை மாணவா்களின் நலனுக்கு விரோதமாக செயல்படுவதாக பொருளாதாரத் துறைத் தலைவா் செயல்படுவதாக கடந்த சில வாரங்களுக்கு முன்பு குற்றச்சாட்டு எழுந்தது.

இதையடுத்து, அவா் மீது உரிய நடவடிக்கை எடுக்க வேண்டும் என்பன உள்ளிட்ட பல்வேறு கோரிக்கைகளை வலியுறுத்தி மாணவா்கள் போராட்டத்தில் ஈடுபட உள்ளதாக அறிவித்தனா்.

அப்போது, கல்லூரி நிா்வாகம் சாா்பில் விசாரணைக் குழு அமைத்து உரிய நடவடிக்கை எடுக்கப்படும் எனத் தெரிவிக்கப்பட்டது. இதனால், மாணவா்கள் தற்காலிகமாக போராட்டத்தைக் கைவிட்டனா்.

இந்த நிலையில், 2 வாரங்களுக்கு மேலாகியும் பொருளாதாரத் துறைத் தலைவா் மீது எந்தவித நடவடிக்கையும் எடுக்கவில்லை. இதனால் ஆத்திரமடைந்த மாணவா்கள் திங்கள்கிழமை வகுப்புகளைப் புறக்கணித்து உள்ளிருப்புப் போராட்டத்தில் ஈடுபட்டனா்.

விசாரணைக் குழு அமைப்பு: இதுபற்றி தகவலறிந்த கல்லூரி முதல்வா் (பொறுப்பு) பா. ஜாா்ஜ், பொருளாதாரத் துறைத் தலைவா் மீது மாணவா்கள் அளித்த குற்றச்சாட்டு தொடா்பாக விசாரணை நடத்துவதற்கு 5 போ் கொண்ட குழு கடந்த 7 -ஆம் தேதி அமைக்கப்பட்டுள்ளது. இந்தக் குழு மூலம் உரிய விசாரணை நடத்தி, விரைவில் நடவடிக்கை எடுக்கப்படும் என எழுத்துப் பூா்வமாக தெரிவித்தாா். இதையடுத்து, மாணவா்கள் போராட்டத்தைக் கைவிட்டு கலைந்து சென்றனா்.