தந்தம் கடத்திய வழக்கு: கேரள சிறையிலிருந்த 2 பேரை காவலில் எடுத்து தமிழக வனத்துறை விசாரணை

தேனி அருகே வனப்பகுதியில் மின்சாரம் பாய்ந்து இறந்த யானையின் தந்தத்தை வெட்டி கடத்தியதாக கைது செய்யப்பட்டு கேரள சிறையில் அடைக்கப்பட்டிருக்கும் இருவரை தமிழக வனத்துறையினர் புதன்கிழமை காவலில் எடுத்து விசாரணை மேற்கொண்டு வருகின்றனர்.
தேனி மாவட்டம் சுருளியாறு மின் உற்பத்தி நிலையம் அருகே கடந்த 11 ஆம் தேதி ஆண் யானை மின்சாரம் பாய்ந்து இறந்தது. அப்பகுதிக்குச் சென்று வனத்துறையினர் யானையை பார்வையிட்டதில், அதன் தந்தம் வெட்டி எடுக்கப்பட்டது தெரியவந்தது. இதையடுத்து அந்த தந்தத்தை குள்ளப்பகவுண்டன்பட்டியைச் சேர்ந்த கங்கா, பிரபு ஆகியோர் குமுளியில் விற்பனை செய்ய முயன்ற போது, தேக்கடி பெரியாறு புலிகள் காப்பகத்தினர் அவர்களை கைது செய்து பீர்மேடு சிறையில் அடைத்தனர்.
இந்நிலையில் யானை தந்தத்தை வெட்டி எடுத்ததாக கம்பம் கிழக்கு வனச்சரகத்தினர் இரண்டு பேர் மீதும் வழக்குப் பதிவு செய்து, தமிழகத்தில் விசாரிக்க அனுமதிக்குமாறு கேரள மாநிலம் பீர்மேடு நீதிமன்றத்தில் மனு கொடுத்தனர். 
அதன்பேரில் பெரியாறு புலிகள் காப்பக வனத்துறையினர் புதன்கிழமை உத்தமபாளையம் குற்றவியல் நடுவர் மன்றத்தில் கங்கா, பிரபு இருவரையும் ஆஜர்படுத்தினர். இதையடுத்து அவர்கள் 2 நாள் காவலில் எடுக்கப்பட்டு மாவட்ட வன அலுவலகத்துக்கு அழைத்து வரப்பட்டனர். அவர்களிடம் மாவட்ட வனக்காப்பாளர் கலாநிதி விசாரணை மேற்கொண்டு வருகிறார்.