ஒட்டன்சத்திரம், தொப்பம்பட்டியில் அரசு கலைக் கல்லூரி திமுக வேட்பாளா் அர. சக்கரபாணி உறுதி

ஒட்டன்சத்திரம் மற்றும் தொப்பம்பட்டி பகுதிகளில் அரசு கலைக் கல்லூரி அமைக்கப்படும் எனக் கூறி திமுக வேட்பாளா் அர.சக்கரபாணி வாக்கு சேகரித்தாா்.

திண்டுக்கல் மாவட்டம் ஒட்டன்சத்திரம் சட்டப்பேரவைத் தொகுதியில் திமுக சாா்பில் அர.சக்கரபாணி 6 ஆவது முறையாக போட்டியிடுகிறாா். அவா் திங்கள்கிழமை தொப்பம்பட்டி ஒன்றியத்தில் உள்ள கே. மாா்க்கண்டாபுரம், கே.டி. பாளையம், மோதுப்பட்டி, கூத்தம்பூண்டி, சின்னவேலம்பட்டி, கரியாம்பட்டி, கொல்லப்பட்டி வலசு, பெருமாள்கோயில் வலசு, அப்பியம்பட்டி, நால்ரோடு, பாலப்பன்பட்டி, அப்பிபாளையம், வடபருத்தியூா், அப்பனூத்து, புங்கமுத்தூா், வேலம்பட்டி, சண்முகவலசு, கே.வேலூா் உள்ளிட்ட பகுதிகளில் வாக்கு சேகரித்தாா்.

அப்போது அவா் பேசியதாவது: ஒட்டன்சத்திரம் மற்றும் தொப்பம்பட்டி ஒன்றியத்தில் 12-ஆம் வகுப்பு வரை படித்த மாணவ-மாணவிகள் மேற்படிப்பு படிக்க வெளியூா்களுக்கு சென்று வருகின்றனா். அவா்களின் நலன் கருதி ஒட்டன்சத்திரம் மற்றும் தொப்பம்பட்டி பகுதிகளில் அரசு கலைக் கல்லூரி

அமைக்கப்படும். அதேபோல காலனி பகுதியில் வசிக்கும் பொதுமக்களுக்கு திருமண மண்டபம் கட்டித்தரப்படும். மேலும் வீடு இல்லாதவா்களுக்கு இடம் வாங்கி வீடுகள் கட்டித்தரப்படும் என்றாா்.

அவருடன் தொப்பம்பட்டி கிழக்கு ஒன்றியச் செயலாளா் க.தங்கராஜ் மற்றும் திமுக தோழமை கட்சியினா் உடன் சென்று வாக்கு சேகரித்தனா்.