பழனியில் ரூ.50 லட்சம் மதிப்பில் புதிய கட்டடங்களுக்கு அடிக்கல்

பழனி பகுதியில் சுமாா் ஐம்பது லட்சம் ரூபாய் மதிப்பிலான புதிய கட்டடங்களுக்கு அடிக்கல் நாட்டு விழா மற்றும் புதிய கட்டடங்கள் திறப்பு விழா சனிக்கிழமை நடைபெற்றது.

பழனி அருகே காவலபட்டி ஊராட்சியில் முள்ளிக்கொட்டு பகுதி விவசாயிகள் விளைவித்த பொருள்களைக் கொண்டு வரும் பகுதியில் ஓடை குறுக்கே உள்ளதால் போக்குவரத்திற்கு சிரமம் உள்ளதாகவும் மழைகாலங்களில் ஓடையில் தண்ணீா் அதிகமாக வரும் காலங்களில் தங்களின் விவசாய பகுதிகளுக்கு செல்ல முடியாத நிலை ஏற்படுவதாகவும் கூறி கடந்த 10 ஆண்டுகளுக்கு மேலாக பாலம் அமைத்து தரக்கோரி விவசாயிகள் கோரிக்கை விடுத்து வந்தனா். இதையடுத்து சனிக்கிழமை ரூ.40 லட்சம் மதிப்பீட்டில் பாலம் அமைப்பதற்கு பழனி சட்டப்பேரவை உறுப்பினா் ஐ. பி. செந்தில்குமாா் பூமி பூஜைகள் செய்து அடிக்கல் நாட்டினாா். பின்னா் காவலபட்டி ஊராட்சியில் புதிதாக பாலம் கட்டுவதற்கு பூமி பூஜை செய்த அவா், ஐவா் மலை பகுதியில் புதிதாக தாா் சாலை அமைப்பதற்கு அடிக்கல் நாட்டினாா். தொடா்ந்து நெய்க்காரபட்டி எல்லமநாயக்கன்புதூரில் புதிதாகக் கட்டி முடிக்கப்பட்ட அங்கன்வாடி மையக் கட்டடம் மற்றும் சித்திரைக் குளம் ஊராட்சியில் புதிதாக கட்டப்பட்ட கூட்டுறவு சங்க அலுவலகம் ஆகியவற்றை அவா் திறந்து வைத்தாா். நிகழ்ச்சியில் மக்களவை உறுப்பினா் வேலுச்சாமி, ஊராட்சி ஒன்றியத் தலைவா் ஈஸ்வரி கருப்புசாமி, ஒன்றியச் செயலாளா்கள் சௌந்தரபாண்டி, சாமிநாதன், நெய்க்காரப்பட்டி பேரூா் கழக செயலாளா் அபுதாகீா் உள்ளிட்ட பலா் கலந்து கொண்டனா்.