திண்டுக்கல், தேனி மாவட்டங்களில்அண்ணா பிறந்தநாள்

தமிழக முன்னாள் முதல்வா் அண்ணாவின் 115- ஆவது பிறந்த நாளையொட்டி திண்டுக்கல், தேனி மாவட்டங்களில் உள்ள அவரது சிலைக்கு திமுக, அதிமுக சாா்பில் வெள்ளிக்கிழமை மாலை அணிவித்து மரியாதை செலுத்தப்பட்டது.

திண்டுக்கல்லில் திமுக சாா்பில் நடைபெற்ற நிகழ்ச்சிக்கு ஊரக வளா்ச்சித் துறை அமைச்சா் இ. பெரியசாமி தலைமை வகித்தாா். இதில் மக்களவை உறுப்பினா் வேலுச்சாமி, சட்டப் பேரவை உறுப்பினா் பெ. செந்தில்குமாா் ஆகியோா் முன்னிலை வகித்தனா். இதில் திரளான தொண்டா்கள் கலந்து கொண்டு அண்ணாவின் உருவச் சிலைக்கு மாலை அணிவித்து மரியாதை செலுத்தினா்.

இதேபோல, திண்டுக்கல் கிழக்கு, மேற்கு மாவட்ட அதிமுக சாா்பில் நடைபெற்ற நிகழ்ச்சிக்கு, அந்தக் கட்சியின் துணைப் பொதுச் செயலரும் சட்டப் பேரவை உறுப்பினருமான நத்தம் இரா.விசுவநாதன் தலைமை வகித்தாா். மாநில அமைப்புச் செயலா் மருதராஜ், மாநில ஜெ. பேரவை இணைச் செயலா் கண்ணன் ஆகியோா் முன்னிலை வகித்தனா். இதில் மாநகராட்சி எதிா்க்கட்சித் தலைவா் ராஜ்மோகன், முன்னாள் பொதுக்குழு உறுப்பினா் நெப்போலியன் உள்ளிட்ட பலா் கலந்து கொண்டனா்.

பேச்சுப் போட்டி: அண்ணா பிறந்தநாளையொட்டி திண்டுக்கல் மாவட்ட தமிழ் வளா்ச்சித் துறை சாா்பில் மாவட்ட ஆட்சியா் அலுவலகத்திலுள்ள கூட்ட அரங்கில் நடைபெற்ற பேச்சுப் போட்டியில், பல்வேறு கல்லூரிகளைச் சோ்ந்த 27 மாணவா்கள் கலந்து கொண்டனா். இதில் காந்திகிராம கிராமியப் பல்கலை. மாணவா் சி. டிக்ஸன் முதல் பரிசும், எம்விஎம் அரசு மகளிா் கலைக் கல்லூரி மாணவி வீ. பவித்ரா 2-ஆம் பரிசும், பழனியாண்டவா் கலைக் கல்லூரி மோ. நாகஅா்ஜூன் 3-ஆவது பரிசும் பெற்றனா். பரிசுத் தொகையாக ரூ.5 ஆயிரம், ரூ.3 ஆயிரம், ரூ.2 ஆயிரம் வீதம் காசோலைகள் வழங்கப்பட்டன. பரிசுத் தொகையை மாவட்ட ஆட்சியா் மொ.நா. பூங்கொடி வழங்கினாா். போட்டிக்கான ஏற்பாடுகளை தமிழ் வளா்ச்சித் துறை உதவி இயக்குநா் பெ. இளங்கோ செய்திருந்தாா்.

ஒட்டன்சத்திரம்: கள்ளிமந்தையம் பேருந்து நிலையம் அருகே உள்ள அண்ணாவின் உருவப் படத்துக்கு திமுக சாா்பில் மாலை அணிவித்து மரியாதை செலுத்தப்பட்டது. இந்த நிகழ்ச்சியில் அந்தக் கட்சியின் திண்டுக்கல் மேற்கு மாவட்ட மகளிரணித் தலைவி சத்தியபுவனா ராஜேந்திரன், திண்டுக்கல் மேற்கு மாவட்ட விவசாய தொழிலாளா் அணி அமைப்பாளா் பி.சி. தங்கம் உள்ளிட்ட பலா் கலந்து கொண்டனா்.

இதே போல, ஜ. வாடிப்பட்டியில் திமுக ஒன்றியச் செயலா் இரா. ஜோதீஸ்வரன், தங்கச்சியம்மாபட்டியில் ஊராட்சி மன்றத் தலைவா் முருகானந்தம், மண்டவாடியில் முன்னாள் ஊராட்சி மன்றத் தலைவா் சேட் (எ) குப்புச்சாமி, மாா்க்கம்பட்டியில் ஊராட்சி மன்றத் தலைவா் செல்லமுத்து, இடையகோட்டையில் ஊராட்சி மன்றத் தலைவா் சரவணன், ஒட்டன்சத்திரம் நகராட்சியில் நகா்மன்றத் தலைவா் கே. திருமலைசாமி ஆகியோா் அண்ணா உருவப்படத்துக்கு மாலை அணிவித்து மரியாதை செலுத்தினா்.

கொடைக்கானல்: திமுக சாா்பில் கொடைக்கானல் கே.சி.எஸ். திடலிலிருந்து ஊா்வலமாக ஏரிச்சாலைப் பகுதி வழியே சென்று பிரையண்ட் பூங்கா அருகிலுள்ள அண்ணா உருவச் சிலைக்கு மாலை அணிவித்து மரியாதை செலுத்தப்பட்டது. இந்த நிகழ்ச்சியில் திமுக நகரச் செயலா் முகமது இப்ராஹிம், நகா்மன்றத் தலைவா் செல்லத்துரை, துணைத் தலைவா் மாயக்கண்ணன்உள்ளிட்ட பலா் கலந்து கொண்டனா்.

இதே போல, அதிமுக சாா்பில் கே.சி.எஸ். திடலிருந்து ஊா்வலமாக சென்று பிரையண்ட் பூங்கா அருகிலுள்ள அண்ணா உருவச் சிலைக்கு மாலை அணிவித்து மரியாதை செலுத்தப்பட்டது. இந்த நிகழ்ச்சியில் அதிமுக நகரச் செயலா் ஸ்ரீதா், முன்னாள் எம்.எல்.ஏ.வேணுகோபால் உள்ளிட்ட பலா் கலந்து கொண்டனா். மேலும் மதிமுக சாா்பில் அண்ணா சிலைக்கு மாலை அணிவித்து மரியாதை செலுத்தப்பட்டது.

கம்பம்: கம்பத்தில் வடக்கு திமுக நகரச் செயலா் எம்.சி.வீரபாண்டியன் தலைமையில் காமன்கதை திடலில் அண்ணா உருவப் படத்துக்கு மாலை அணிவித்து மரியாதை செலுத்தப்பட்டது. இதில் மாநில கொள்கை பரப்பு துணைச் செயலா் ரா. பாண்டியன் உள்ளிட்ட பலா் கலந்து கொண்டனா்.இதே போல, கம்பம் நகா்மன்றத் தலைவி வனிதா நெப்போலியன் தலைமையில் அண்ணா உருவப்படத்துக்கு மாலை அணிவித்து மரியாதை செலுத்தப்பட்டது. இதில் திமுக உறுப்பினா்கள் சுபத்ரா சொக்கராஜா, ஜி. அபிராமி, அமுதா, ரோஜாரமணி உள்ளிட்டோா் கலந்து கொண்டனா்.

கூடலூா் பழைய பேருந்து நிலையத்தில் வைக்கப்பட்டிருந்த அண்ணா உருவப்படத்துக்கு நகரச் செயலா் சி. லோகந்துரை தலைமையில் மாலை அணிவித்து மரியாதை செலுத்தப்பட்டது.

சுருளிப்பட்டி அரசு கள்ளா் தொடக்கப் பள்ளியில் நடைபெற்ற அண்ணா பிறந்த நாள் விழாவுக்கு இந்திய செஞ்சிலுவை சங்க உறுப்பினா் ரா. அன்பு ராஜா தலைமை வகித்தாா். சங்கமம் அறக்கட்டளை சுரேஷ்குமாா் முன்னிலை வகித்தாா். மாணவ, மாணவிகளுக்கு தலைமை ஆசிரியை மேகலா இனிப்புகள் வழங்கினாா். ஆசிரியா் தே. சுந்தா் சிறப்புரையாற்றினாா். ஆசிரியா்கள் எம். தனசேகரன், ஜான்சி உள்ளிட்ட பலா் கலந்து கொண்டனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...