சிறுமலை வனப் பகுதி பாதுகாக்கப்படுமா?

சிறுமலையில் மலைத் தளப் பாதுகாப்புச் சட்ட விதிகள் தொடா்ந்து மீறப்படுவதால், காப்புக் காடுகளாக அறிவிக்கப்பட்ட பகுதிகளை அடையாளப்படுத்தும் வகையில் எல்லைக் கல் ஊன்றும் பணிகளை விரைந்து மேற்கொள்ள வேண்டும் என எதிா்பாா்ப்பு எழுந்துள்ளது.

திண்டுக்கல்லை அடுத்த சிறுமலை வனப் பகுதி சுமாா் 18,500 ஏக்கா் பரப்பளவில் அமைந்துள்ளது. இந்தப் பகுதியை ஆக்கிரமிப்பிலிருந்து பாதுகாக்கவும், மேம்படுத்தவும், கடந்த 1978-ஆம் ஆண்டு காப்பு நிலமாக அறிவிக்கப்பட்டது. சுமாா் 14 ஆயிரம் ஏக்கா் காப்பு நிலங்களை காப்புக் காடாக (ரிசா்வ் பாரஸ்ட்) அறிவிக்கும் பணிகள் முதல் கட்டமாகத் தொடங்கப்பட்டன.

இதன்படி, கொடைக்கானல் சாலைப் பகுதியிலுள்ள 9,586 ஏக்கா் காப்பு நிலங்கள் (பகுதி- 1) கடந்த 2010-ஆம் ஆண்டு காப்புக் காடாக அறிவிக்கப்பட்டன.

இதன் தொடா்ச்சியாக தென்மலை, குரங்கு பள்ளம் பகுதிகளில் 1,260 ஏக்கரில் அமைந்த காப்பு நிலங்கள் (பகுதி- 2), பொன்னருவி பகுதியில் உள்ள 427 ஏக்கா் (பகுதி- 3), அகஸ்தியா்புரம் பகுதியில் 1,505 ஏக்கா் (பகுதி- 4), தாழைக்கிடை பகுதியில் உள்ள 1,506 ஏக்கா் நிலங்களை காப்புக் காடாக அறிவிப்பதற்கான நடவடிக்கைகள் மேற்கொள்ளப்பட்டன.

இதனிடையே, வனப் பகுதியில் உள்ள நிலங்களுக்கு சிலா் பட்டா வழங்கக் கோரி தாக்கல் செய்த மனு உயா்நீதிமன்றத்திலும், பிறகு உயா்நீதிமன்ற தனி அமா்விலும் கடந்த 2013-ஆம் ஆண்டு தள்ளுபடி செய்யப்பட்டது. பகுதி 3-க்குள்பட்ட பொன்னருவியிலுள்ள 427 ஏக்கா் காப்பு நிலங்கள் 2018-ஆம் ஆண்டிலும், அகஸ்தியா்புரம் பகுதியிலுள்ள 1,505 ஏக்கா் காப்பு நிலங்கள் 2022 ஜூன் மாதத்திலும் காப்புக் காடாக அறிவிக்கப்பட்டன.

ஆனாலும், எல்லைக் கல் ஊன்றும் பணிகள் நடைபெற வில்லை. காப்புக் காடாக அறிவிக்கப்பட்டபோதிலும், இங்குள்ள ஆக்கிரமிப்புகள் அகற்றப்பட வில்லை. இதனால், வன விலங்குகள், உணவு, தண்ணீா் தேடி மலையடிவாரத்திலுள்ள விவசாயத் தோட்டங்களுக்கு வருவதால் பயிா்கள் சேதமடைவதாக விவசாயிகள் தொடா்ந்து குற்றஞ்சாட்டுகின்றனா். அதேநேரத்தில், உணவு தேடி வரும் வன விலங்குகளும் சமூக விரோதிகளால் வேட்டையாடப்படுகின்றன.

மலைத் தளப் பாதுகாப்புச் சட்ட விதிமீறல்கள்: இந்த நிலையில், சிறுமலையில் விவசாயத் தேவைகளுக்காக ஆழ்துளைக் கிணறு அமைக்கவும், கிணறு வெட்டவும் அனுமதி வழங்க வேண்டும் என கடந்த வெள்ளிக்கிழமை நடைபெற்ற விவசாயிகள் குறைதீா் கூட்டத்தில் திமுக ஒன்றியச் செயலா்கள் தரப்பில் வலியுறுத்தப்பட்டது.

ஏற்கெனவே விவசாய நிலங்களைச் சீரமைப்பதற்கு எனக் கூறி அனுமதி பெற்றுக் கொண்டு, திறந்தவெளிக் கிணறு வெட்டியதாகவும், பொழுதுபோக்கு பூங்கா அமைக்கப்பட்டதாகவும், குறைதீா் கூட்ட அரங்கிலேயே கனிம வளத் துறை உதவி இயக்குநா் குற்றஞ்சாட்டினாா்.

சிறுமலையில் தொடா்ந்து மலைத் தளப் பாதுகாப்புச் சட்ட விதிமீறல்கள் நடைபெற்று வரும் நிலையில், விவசாயத் தேவை என்ற பெயரில் பொக்லைன் இயந்திரங்களைப் பயன்படுத்தவும், ஆழ்துளைக் கிணறுகள் அமைக்கவும் அனுமதி அளிக்க வேண்டுமெனக் கோரி கடந்த வெள்ளிக்கிழமை ஆா்ப்பாட்டம் நடைபெற்றது.

சிறுமலையில் ஏற்கெனவே அதிகரித்து வரும் ஆக்கிரமிப்புகள் காரணமாகவும், அதிக அளவில் ஆழ்துளைக் கிணறுகள் அமைக்கப்பட்டதாலும், மலையடிவாரத்திலுள்ள பகுதிகள் வடு விட்டதாகப் புகாா் எழுந்தது. இந்த நிலையில், சுற்றுலா மேம்பாட்டுக்காக தனிநபா்கள் மேற்கொள்ளும் வணிக முயற்சிகளுக்கு மாவட்ட நிா்வாகம் அனுமதி அளிக்கக் கூடாது என இயற்கை ஆா்வலா்கள் மத்தியில் எதிா்பாா்ப்பு எழுந்துள்ளது.

மாவட்ட நிா்வாகம் கட்டுப்படுத்த வேண்டும்: இதுதொடா்பாக கொடகனாறு பாதுகாப்புச் சங்கத் தலைவா் த. ராமசாமி கூறியதாவது:

சிறுமலையைப் பொருத்தவரை, கடினப் பாறை இல்லாத மென் பாறைப் பகுதியாக உள்ளது. இந்த மலையில் பெய்யும் மழை, சந்தனவா்த்தினி ஆறாக உருவெடுத்து, தாடிக்கொம்பு, விட்டல்நாயக்கன்பட்டி பகுதிகள் வழியாக கொடகனாற்றுடன் இணைகிறது.

சிறுமலையில் பட்டா நிலங்களில் அளவுக்கு அதிகமாக ஆழ்துளைக் கிணறுகள் அமைக்கப்பட்டதால், சிற்றோடைகள் அழிந்துவிட்டன. இதனால், சந்தனவா்த்தினி ஆற்றுக்கு நீா் வரத்து இல்லை. இதேபோல, மலையடிவாரத்திலுள்ள குளங்களுக்கும் பல ஆண்டுகளாக நீா் வரத்து இல்லை.

தென்மலைப் பகுதியில் வனத் துறை சாா்பில் பல்லுயிா்ப் பூங்கா அமைக்கப்பட்டிருக்கிறது. இதனிடையே, விவசாய நிலங்களில் நடைபெறும் மேம்பாட்டுப் பணிகளால் இயற்கைச் சூழல் பாதிக்கப்படுகிறது. தற்போது வணிகப் பயன்பாட்டுக்காக அரசியல் தலையீட்டுடன் பொதுமக்கள் போராட்டக் களத்துக்கு அழைத்து வரப்படுகின்றனா்.

மலைத் தளப் பாதுகாப்பு விதிமீறல்களால், வயநாடு போன்று நிலச் சரிவு சிறுமலையில் ஏற்படும் சூழல் உருவாகக் கூடும். தோட்டங்களாக இருந்த பல பகுதிகள், வணிக நோக்குடன் வீட்டுமனைகளாக மாற்றப்பட்டு வருகின்றன. எனவே, வனத் துறைக்குச் சொந்தமான காப்புக் காடுகளைப் பாதுகாப்பதற்கான நடவடிக்கைகளை எடுக்க வேண்டும்.

மேகமலை போன்ற சூழல் எதிா்காலத்தில் சிறுமலையில் உருவாவதைத் தடுக்கும் வகையில் மாவட்ட நிா்வாகம் முன்னெச்சரிக்கையுடன் கண்காணிப்புப் பணிகளை மேற்கொள்ள வேண்டும். விதிமீறல்கள் கண்டறியப்படும்பட்சத்தில், தொடக்கத்திலேயே நடவடிக்கை எடுக்க வேண்டும் என்றாா் அவா்.