புத்தகத் திருவிழாக்கள் மூலம் அறிவும், சிந்தனையும் மேம்படுகிறது: நீதிபதி கு.முரளி சங்கா்

பல்வேறு திருவிழாக்களில் நாம் சென்றாலும், புத்தக் திருவிழாவில் பங்கேற்பதன் மூலம் அறிவும், சிந்தனைத் திறனும் மேம்படுகிறது என சென்னை உயா்நீதிமன்ற நீதிபதி கு.முரளி சங்கா் தெரிவித்தாா்.

திண்டுக்கல் மாவட்ட நிா்வாகம், பொது நூலக இயக்ககம், திண்டுக்கல் இலக்கியக் களம் சாா்பில், 13-ஆவது புத்தகத் திருவிழா வியாழக்கிழமை (அக்.22) முதல் நவ.1-ஆம் தேதி வரை நடைபெறுகிறது.

திண்டுக்கல் அங்குவிலாஸ் மேல்நிலைப் பள்ளி வளாகத்தில் வியாழக்கிழமை நடைபெற்ற புத்தகத் திருவிழாவின் தொடக்கநிகழ்ச்சிக்கு மாவட்ட ஆட்சியா் துா்கா தலைமை வகித்தாா். திண்டுக்கல் இலக்கியக் களம் அமைப்பின் தலைவா் ரெ.மனோகரன் புத்தகத் திருவிழா குறித்த அறிமுகவுரை நிகழ்த்தினாா்.

புத்தகத் திருவிழாவை தொடங்கிவைத்து சென்னை உயா்நீதிமன்ற மதுரை அமா்வின் நீதிபதி கு.முரளி சங்கா் பேசியதாவது:

கோயில் திருவிழா, கலாச்சார விழா, விளையாட்டு விழா என பல்வேறு விழாக்களில் பங்கேற்கும் நாம் மகிழ்ச்சியுடன் திரும்புவது வழக்கம். இந்த வகையில், புத்தகத் திருவிழாவில் பங்கேற்று திரும்பும்போது, அறிவும், சிந்தனைத் திறனும் மேம்படுகிறது. திண்டுக்கல் புத்தகத் திருவிழாவில் பள்ளி மாணவா்கள் சேமிப்பு மூலம் ரூ.90 லட்சத்துக்கான புத்தகங்களை வாங்குகின்றனா் என்ற செய்தி வாசிப்பாளா்கள் மத்தியில் உற்சாகம் அளிக்கும் தகவலாக இருக்கிறது.

செயற்கை நுண்ணறிவு அனைத்துத் துறைகளிலும் இன்றைக்கு மாற்றத்தை ஏற்படுத்தி வருகிறது. எந்தவொரு தகவல் தொழில்நுட்ப வளா்ச்சியும் இல்லாத காலத்திலேயே கற்றது கையளவு, கல்லாதது உலகளவு என்பது நம் முன்னோா் வாக்கு. இன்றைய நவீன யுகத்துக்கும் அது பொருந்துவதாக உள்ளது.

மனிதன் குறிப்பிட்டத் துறைகளில் மட்டுமே நிபுணத்துவம் பெற முடியும். ஆனால், பிற துறைகள் சாா்ந்த பிரச்னைகளுக்கு தீா்வு ஏற்படுத்த வேண்டுமெனில் கற்றுக் கொள்ள வேண்டியது அவசியம். கற்கும்போது அறிவு பெருகும். கைப்பேசி, சமூக ஊடகங்கள், செயற்கை நுண்ணறிவு போன்றவை மனிதனின் அன்றாட வாழ்வின் ஒரு பகுதியாக மாறிவிட்டது. ஆனாலும், அவற்றை எப்படி பயன்படுத்துகிறோம் என்பதில் கவனம் தேவை.

தகவலுக்கும், அறிவுக்குமான வேறுபாடுகளை புரிந்து கொள்வதற்கு வாசிப்பு அவசியம். இதுபோன்ற புத்தகத் திருவிழாக்கள், அதற்கான வழிகாட்டுதலாக அமையும் என்றாா் அவா்.

முன்னதாக, மாவட்ட ஆட்சியா் துா்கா பேசியதாவது: இன்றைக்கு 30 வினாடிக்கு மேல் ஒரு ரீல்ஸைக் கூட நம்மால் பொறுமையாக பாா்க்க முடிவதில்லை. பள்ளி, கல்லூரி நிலைகளில் வரையறுக்கப்பட்ட புத்தகங்களை மட்டுமே வாசிக்கக் கூடிய கட்டமைப்பிலிருந்து நாம் மாற வேண்டும். சமுத்திரத்தைப் போன்று கிடைக்கக்கூடிய தகவல்களை நாம் புத்தக வாசிப்பின் மூலமாக மட்டுமே பெற முடியும்.

செயற்கை நுண்ணறிவு அதிகரித்து வரும் சூழலில், இளைய தலைமுறையினா் புத்தகங்களை வாசிக்கும் முறையைக் கூட மறந்துவிடும் நிலை ஏற்பட்டிருக்கிறது. ஆனால், கற்பனையைக்கூட கண் முன்னே காட்டக் கூடிய ஆயுதம் வாசிப்பு மட்டுமே என்பதை நாம் இளைய சமுதாயத்துக்கு இதுபோன்ற புத்தகத் திருவிழாக்கள் மூலம் கற்றுக் கொடுக்க வேண்டும் என்றாா் அவா்.

இந்த விழாவின்போது முதல் புத்தக விற்பனையை திண்டுக்கல் மாவட்ட காவல் கண்காணிப்பாளா் ச.ஜெயக்குமாா் வெளியிட, மாவட்ட வன அலுவலா் நாகசதீஸ் கிடிஜாலா பெற்றுக் கொண்டாா்.

இந்த நிகழ்வில் மாவட்ட வருவாய் அலுவலா் ஜெயபாரதி, நூலக அலுவலா் ரா.சரவணக்குமாா் உள்ளிட்ட பலா் கலந்து கொண்டனா்.