கொடைக்கானலில் பெய்த பலத்த மழையால் சின்னூறாற்றில் காட்டாற்று வெள்ளம்

பலத்த மழை காரணமாக, கொடைக்கானல் சின்னூா் கல்லாற்றில் திங்கள்கிழமை காட்டாற்று வெள்ளம் ஏற்பட்டது.

கொடைக்கானல் கீழ்மலைப் பகுதியான வெள்ளகெவி ஊராட்சிக்கு உள்பட்ட சின்னூா், பெரியூா் உள்ளிட்ட பகுதிகள் உள்ளன. இந்தக் கிராமங்களில் வசிக்கும் பொதுமக்கள், விவசாயிகள் தங்களுக்குத் தேவையான பொருள்களை பெரியகுளம் சென்று வாங்கி வருவது வழக்கம். இந்தப் பொருள்களை தாங்கள் வளா்க்கும் குதிரைகள், கழுதைகள் மூலம் எடுத்து வருவா்.

இந்த நிலையில், சின்னுா், பெரியூா் கிராம மக்கள், விவசாயிகள் தங்களுக்குத் தேவையான பொருள்களை வாங்கி விட்டு மீண்டும் தங்களது ஊருக்கு திங்கள்கிழமை திரும்பிக் கொண்டிருந்தனா். அப்போது, தொடா் மழை காரணமாக, தங்களது ஊருக்குச் செல்லும் வழியில் உள்ள சின்னூா் கல்லாற்றில் திடீரென வெள்ளப் பெருக்கு ஏற்பட்டதால், ஆற்றைக் கடக்க முடியாமல் தவித்தனா்.

இதையடுத்து, அந்தப் பகுதி இளைஞா்கள் இவா்களை கயிறு கட்டி ஒரு கரையில் இருந்து மறுக்கரைக்கு அழைத்து வந்தனா். இதேபோல, இவா்கள் தங்களது கால்நடைகளையும் கயிறு கட்டி இழுத்துச் சென்றனா்.

இதுகுறித்து அந்தப் பகுதி மக்கள் தெரிவித்ததாவது:

சின்னூா் கல்லாற்றில் பாலம் அமைத்துத் தர வேண்டுமென பல ஆண்டுகளாக கோரிக்கை விடுத்து வருகிறோம். ஆனால், இதுவரை எந்த அரசும் எங்களது கோரிக்கையை நிறைவேற்றவில்லை. மழைக் காலங்களில் பெரிதும் அவதியடைந்து வருகிறோம். எனவே, தவெக அரசு இந்தப் பகுதியில் பாலம் அமைக்க நடவடிக்கை எடுக்க வேண்டும் என்றனா்.