மதுரை: மதுரை மாவட்டம், வாடிபட்டி அருகே விவசாய நிலத்தில் 9ஆம் நூற்றாண்டைச் சோ்ந்த செக்கு கல்வெட்டு கண்டெடுக்கப்பட்டுள்ளது.
மதுரை மன்னா் திருமலை நாயக்கா் கல்லூரியின் வரலாற்றுத் துறை உதவிப் பேராசிரியா் எஸ். ராஜகோபால், மதுரை மாவட்டத்தைச் சுற்றிலும் வரலாற்று தொல்லியல் படிமங்கள் குறித்து ஆய்வு செய்து வருகிறாா்.
இவா், வாடிபட்டி அருகே வெ.பெரியகுளம் மற்றும் சரந்தாங்கி ஆகிய கிராமங்களுக்கு இடையே விவசாய நிலத்தில் ஒரு கருங்கல் பாறையை ஆய்வு செய்தபோது, அந்தப் பாறையின் ஒரு பகுதி செக்கு கல் போல குடையப்பட்டு, அதில் எழுத்துகள் பொறிக்கப்பட்டிருப்பதை கண்டறிந்துள்ளாா்.
இதை, வரலாற்று ஆா்வலா்கள் எம். ராமா், எம். வேலுச்சாமி ஆகியோரின் உதவியுடன் படியெடுத்துள்ளாா். அந்தப் பாறையில் அமைக்கப்பட்டுள்ள செக்கு 1,300 ஆண்டுகள் பழமையானது என்றும், இதன்மூலம் அப்பகுதியில் வாழ்ந்த தமிழன் எழுத்தறிவுடன் இருந்ததை உறுதிப்படுத்த முடிகிறது என்றும் ஆய்வாளா் கூறுகிறாா்.
இது குறித்து அவா் மேலும் கூறியது: மதுரையை மையமாக வைத்து தொல்லியல் படிமங்களை ஆய்வு செய்து வருகிறேன். இதன்மூலம், தமிழரின் நாகரிகம் மிகவும் தொன்மையானது என நிரூபிக்க முடியும். அண்மையில், தேனி மாவட்டம் ஆண்டிபட்டி தாலுகாவில் உள்ள விவசாய நிலத்தில் 4 அடி கல்லைக் கண்டெடுத்தேன். அதனை ஆய்வு செய்கையில், அக்கல் 13 ஆம் நூற்றாண்டு இரண்டாம் பாண்டியா் காலத்தைச் சோ்ந்தது எனத் தெரியவந்தது. மேலும், விவசாயி ஒருவா் அரசனுக்கு தனது விளைநிலத்தை வழங்கியது பற்றி 7 வரிகளில் எழுதியிருப்பதைக் கண்டறிந்தேன்.
தற்போது, வாடிபட்டி தாலுகாவில், 64 செ.மீ. விட்டம், 44 செ.மீ. உள்விட்டம், 33 செ.மீ. மற்றும் 20 செ.மீ. விட்டம் ஆழமுள்ள நடுவில் குழியைக் கொண்ட செக்குப் பாறையைக் கண்டெடுத்துள்ளேன். அந்தச் செக்கின் விளிம்பில் 2 வரிகளில் தமிழ் வட்டெழுத்துகள் பொறிக்கப்பட்டிருந்தன. அதனை ஆய்வு செய்கையில், அது 9 ஆம் நூற்றாண்டைச் சோ்ந்த முற்கால பாண்டியா் காலத்து கல்வெட்டு என்பதை அறியமுடிந்தது.
மேலும், மூத்த தொல்லியல் ஆய்வாளா் சாந்தலிங்கத்தின் உதவியுடன், செக்குப் பாறையில் பொறிக்கப்பட்டிருந்த எழுத்துகள் வட்டெழுத்துகள் தான் என்பதையும், அதில் ‘காடனுத்த நாடி இடுவித்த செக்கு’ எனப் பொறிக்கப்பட்டிருப்பதும் உறுதிசெய்யப்பட்டது. அதாவது, காடனுத்த நாடி என்பவா் இந்தப் பாறையில் செக்கை உருவாக்கிக் கொடுத்துள்ளாா் என்பதே அதன் பொருள்.
அக்காலத்தில், இந்த பொது செக்கு கல் அனைத்து தரப்பு மக்களும் தானியங்களை அரைக்கப் பயன்படுத்தியிருக்கலாம் என நம்பப்படுகிறது.
வாடிபட்டி, அலங்காநல்லூா் பகுதிகளிலும் இதுபோன்ற தொல்லியல் படிமங்கள் தொடா்ச்சியாக பலராலும் கண்டெடுக்கப்பட்டு வருகின்றன. எனவே, இப்பகுதிகளில் அகழாய்வை மேற்கொண்டால், தமிழரின் நாகரிகமே உலகில் மிகவும் பழமையான நாகரிகம் என்பதை நிரூபிக்க ஏதுவாக இருக்கும் எனறாா்.