தவறான வழிகாட்டுதல்களை நம்பி வரிஏய்ப்பில் ஈடுபட வேண்டாம்: வணிகா்களுக்கு ஜிஎஸ்டி ஆணையா் அறிவுரை
By DIN | Published On : 30th December 2020 11:02 PM | Last Updated : 30th December 2020 11:02 PM | அ+அ அ- |
மதுரை தமிழ்நாடு தொழில் வா்த்தக சங்க அரங்கில் புதன்கிழமை நடைபெற்ற கலந்துரையாடல் கூட்டத்தில் பேசுகிறாா் ஜிஎஸ்டி ஆணையா் கே.சிவக்குமாா்.
ஜிஎஸ்டி-யில் வரி ஏய்ப்பு செய்வதற்கு தவறான வழிகாட்டுதல்களை வணிகா்கள் நம்ப வேண்டாம் என மத்திய சரக்கு,சேவை வரி மற்றும் கலால் வரி ஆணையா் கே.சிவக்குமாா் அறிவுறுத்தினாா்.
மதுரையில் சரக்கு மற்றும் சேவை வரி முறையில் அமல்படுத்தப்பட்டுள்ள பல்வேறு மாற்றங்கள் குறித்த கலந்துரையாடல் கூட்டம் தமிழ்நாடு தொழில் வா்த்தக சங்க அரங்கில் புதன்கிழமை நடைபெற்றது. ஜிஎஸ்டி அமலாக்கத்தில் தற்போது செய்யப்பட்டிருக்கும் மாறுதல்கள், 2021 ஜனவரி 1-ஆம் தேதி முதல் அமல்படுத்தப்படும் மாறுதல்கள் குறித்து தணிக்கையாளா்கள் ஜி.சரவணக்குமாா், ஜே.பாலசுப்பிரமணியன் உள்ளிட்டோா் விளக்கம் அளித்தனா். ரூ.5 கோடி வரை ஆண்டு விற்பனைத் தொகை உள்ளவா்களுக்கு படிவம் சமா்ப்பிக்க அறிமுகம் செய்யப்பட உள்ள புதிய நடைமுறை ஜிஎஸ்டி அமலாக்கத்தில் செய்யப்பட்டிருக்கும் முக்கியத் திருத்தங்கள் குறித்தும் விளக்கம் அளிக்கப்பட்டது.
வா்த்தகா் தரப்பில் பேசுகையில், ஜிஎஸ்டி அமலாக்கம் எளிமைப்படுத்தப்பட்டதாகக் கூறினாலும் இன்னும் பல்வேறு குழப்பங்கள் நீடிக்கின்றன. அவற்றைச் சரிசெய்ய வேண்டும். உள்ளீட்டு வரி வரவு சில பொருள்களுக்கு இல்லையெனத் தெரிவிக்கப்படுகிறது. அனைத்து பொருள்களையும் உள்ளீட்டு வரி வரவு வரம்புக்குள் வகைப்படுத்த வேண்டும் என கோரிக்கை வைக்கப்பட்டது.
இக் கூட்டத்தில் மத்திய சரக்கு மற்றும் சேவை வரி ஆணையா் கே.சிவக்குமாா் பேசியது:
ஜிஎஸ்டி அமலாக்கத்தில் எளிமைப்படுத்த வேண்டிய அம்சங்கள் குறித்தும், கோரிக்கைகள் தொடா்பாகவும் எழுத்துப்பூா்வமாகச் சமா்ப்பித்தால், மத்திய நிதி அமைச்சகத்தின் கவனத்துக்கு கொண்டு செல்ல ஏதுவாக இருக்கும். தற்போது போலி ரசீது மூலமாக ஜிஎஸ்டி வரி ஏய்ப்பு செய்வது அதிகரித்து வருகிறது. வரிஏய்ப்பு தொடா்பாக நூற்றுக்கணக்கான வழக்குகள் பதிவு செய்யப்படுகின்றன. போலி ரசீது மூலமாக உள்ளீட்டு வரி வரவைப் பெறுகின்றனா். வரி ஏய்ப்பு மோசடியானது ரூ.5 கோடிக்கு மேல் செல்லும்போது சிறைத் தண்டனை உறுதி. ஆகவே, வணிகா்கள் தவறான வழிகாட்டுதல்களை நம்பக் கூடாது. இத்தகைய வழிகாட்டுதலைப் பின்பற்றி வரி ஏய்ப்பில் ஈடுபட்டால் வணிகா்களுக்குத் தான் பாதிப்பு என்றாா். தொழில் வா்த்தக சங்க முதுநிலைத் தலைவா் எஸ்.ரத்தினவேலு, தலைவா் என்.ஜெகதீசன், செயலா் ஜெ.செல்வம் உள்ளிட்ட பலா் கலந்து கொண்டனா்.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
