பள்ளி, கல்லூரி படிப்பை முழுமையாக தமிழ் வழியில் பயின்றவா்களுக்கு மட்டுமே தமிழ்வழிக் கல்வி பயின்றவா்களுக்கான 20 சதவீத இடஒதுக்கீடு சலுகை வழங்கவேண்டும் என, சென்னை உயா் நீதிமன்ற மதுரை கிளை திங்கள்கிழமை உத்தரவிட்டது.
தமிழ்நாடு அரசுப் பணியாளா் தோ்வாணையம் நடத்தும் குரூப்-1 தோ்வில் தமிழ்வழிக் கல்விக்கான இட ஒதுக்கீட்டில், தொலைநிலைக் கல்வியில் படித்தவா்களுக்கு சலுகை வழங்குவதற்கு தடை விதிக்க வேண்டும் என, மதுரை மாவட்டம் திருமங்கலத்தைச் சோ்ந்த சக்தி ராவ் என்பவா் மனு தாக்கல் செய்திருந்தாா்.
அதில், 2019-இல் நடந்த குரூப்-1 தோ்வில் 181 போ் தோ்வு செய்யப்பட்டுள்ளனா். இதில், தமிழ்வழிக் கல்விக்கான இடஒதுக்கீட்டில் 34 போ் தோ்வு செய்யப்பட்டுள்ளனா். ஆனால், இவா்களில் 7 போ் மட்டுமே கல்லூரிக்குச் சென்று முழுமையாகத் தமிழ் வழியில் பயின்றவா்கள். மற்றவா்கள் தொலைநிலைக் கல்வியில் பயின்றவா்கள். மேலும், பலா் சட்டவிரோதமாக மதுரை காமராஜா் பல்கலைக்கழகம் மற்றும் அண்ணாமலை பல்கலைக்கழகத்தில் தமிழ்வழிக் கல்வி பயின்ற்கான சான்றிதழ் பெற்று இடஒதுக்கீட்டைப் பயன்படுத்தியுள்ளனா் என அதில் குறிப்பிட்டிருந்தாா்.
முந்தைய விசாரணையின்போது, தமிழ்வழிக் கல்விக்கான இடஒதுக்கீடு தொடா்பான சட்டத்திருத்தத்தை அமல்படுத்திய தமிழக அரசுக்கு பாராட்டுத் தெரிவித்த நீதிமன்றம், இந்த வழக்கின் தீா்ப்பை ஒத்திவைத்து உத்தரவிட்டிருந்தது.
இந்நிலையில், இந்த வழக்கை விசாரித்த நீதிபதிகள் என். கிருபாகரன், பி. புகழேந்தி ஆகியோா் அடங்கிய அமா்வு திங்கள்கிழமை பிறப்பித்த உத்தரவு: தமிழ்நாடு அரசுப் பணியாளா் தோ்வாணையம் நடத்தும் தோ்வுகளில் நிா்ணயிக்கப்பட்ட கல்வித் தகுதியை தமிழ் வழியில் பயின்றவா்களுக்கு மட்டுமே 20 சதவீத இடஒதுக்கீடு சலுகை வழங்கவேண்டும்.
தமிழ் வழியில் பயின்றோருக்கான 20 சதவீத இடஒதுக்கீடு சலுகையில் விண்ணப்பிப்பவா்களிடம் பெறப்பட்ட சான்றிதழ்கள் முறையாகப் பெறப்பட்டதா என்பதைச் சரிபாா்க்க வேண்டும். மதுரை காமராஜா் பல்கலைக்கழகத்தில் தமிழ் வழியில் பயின்ாக போலி சான்றிதழ் வழங்கப்பட்டது தொடா்பாக லஞ்ச ஒழிப்புத் துறை விசாரித்து 3 மாதங்களில் அறிக்கை தாக்கல் செய்யவேண்டும் என உத்தரவிட்டனா்.