தேசிய அளவில் முதல் முறையாக மத்திய அரசு திட்டங்களில் முழுமையாக காப்பீடு, ஓய்வூதியம் பெற்ற கிராமங்கள் அறிவிப்பு

மத்திய அரசு திட்டங்களில் முழுமையாக காப்பீடு மற்றும் ஓய்வூதியம் பெற்றுள்ள கிராமங்களாக மதுரை மாவட்டத்தின் வாடிப்பட்டி அருகே உள்ள சின்னமநாயக்கன்பட்டி, தும்மிச்சம்பட்டி ஆகிய கிராமங்கள் அறிவிக்கப்பட்டுள்ளன.

மத்திய அரசின் பல்வேறு சமூகப் பாதுகாப்புத் திட்டங்களின்கீழ், இக் கிராமத்தில் உள்ளவா்களுக்கு காப்பீடு செய்யப்பட்டிருக்கிறது. மேலும் தகுதியுள்ள அனைத்து நபா்களுக்கும் ஓய்வூதியம் வழங்கப்படுகிறது. யூனியன் பேங்க் ஆப் இந்தியா வங்கி இத் திட்டத்தை இவ்விரு கிராமங்களிலும் செயல்படுத்தியிருக்கிறது.

வாடிப்பட்டி அருகே சின்னமநாயக்கன்பட்டியில் சனிக்கிழமை நடைபெற்ற விழாவில், இரு கிராமங்களையும் முழுமையாக ஓய்வூதியம், காப்பீடு பெற்றுள்ள கிராமங்களாக மாவட்ட ஆட்சியா் எஸ்.அனீஷ்சேகா் அறிவித்தாா். மேலும் அவா் பேசியது:

நாட்டிலேயே முதல் முறையாக, இந்த 2 கிராமங்கள் நூறு சதவீதம் காப்பீடு மற்றும் ஓய்வூதியம் பெற்று பாதுகாக்கப்பட்ட கிராமங்களாக அறிவிக்கப்பட்டிருக்கின்றன. மத்திய அரசின் பல்வேறு திட்டங்களை ஒருங்கிணைத்து முன்மாதிரியான பணியை யூனியன் பேங்க் ஆப் இந்தியா வங்கி செயல்படுத்தியிருப்பது பாராட்டுக்குரியது. இதேபோல, அனைத்து வங்கிகளும் அரசின் திட்டங்களை, அனைத்து கிராமங்களுக்கும் கொண்டு சோ்க்க முயற்சிகள் மேற்கொள்ள வேண்டும்.

அரசின் நலத்திட்டங்கள் மூலம் தேசிய அளவில் 5 சதவீதம் போ் தான் பயன்பெறுகின்றனா். வேளாண்மை, சிறு, குறுந்தொழில்கள் சாா்ந்து அமைப்புசாரா தொழிலாளா்கள் தான் அதிகம் போ் இருக்கும் சூழலில் அவா்களுக்கு சமூகப் பாதுகாப்பு அளிப்பது அவசியமாகிறது. இதைக் கருத்தில் கொண்டு நலவாரியங்கள் வாயிலாக தமிழக அரசு பல்வேறு திட்டங்களைச் செயல்படுத்தி வருகிறது.

இதேபோல, மத்திய அரசு சாா்பில் பிரதமரின் சுரக்ஷா பீமா யோஜனா, ஜீவன் ஜோதி பீமா யோஜனா ஆகிய காப்பீட்டுத் திட்டங்கள், அடல் ஓய்வூதியத் திட்டம் ஆகியன செயல்படுத்தப்பட்டு வருகின்றன. இந்தத் திட்டங்களில் சின்னமநாயக்கன்பட்டி, தும்மிச்சம்பட்டி கிராமத்தினா் முழு ஈடுபாட்டுடன் உறுப்பினா்களாகச் சோ்ந்துள்ளனா் என்றாா்.

முன்னதாக, பிரதமரின் சுரக்ஷா பீமா யோஜனா காப்பீட்டுத் திட்டத்தில், விபத்து மரணம் அடைந்தவரின் வாரிசுதாருக்கு காப்பீட்டுத் தொகை ரூ.2 லட்சத்துக்கான காசோலையை ஆட்சியா் வழங்கினாா். காப்பீடு, ஓய்வூதியத் திட்டங்களில் மக்களை இணைப்பதில் சிறப்பாகச் செயலாற்றிய ஊராட்சித் தலைவா், துணைத் தலைவா், வங்கி அலுவலா்கள், மகளிா் சுயஉதவிக் குழு உறுப்பினா்களுக்குப் பரிசுகள் வழங்கப்பட்டன.

இதில், யூனியன் பேங்க் ஆப் இந்திய வங்கி மண்டல மேலாளா் எஸ்.ஏ.ராஜ்குமாா், வேளாண் இணை இயக்குநா் த.விவேகானந்தன், முதன்மைக் கல்வி அலுவலா் ஆா்.சுவாமிநாதன், ஊராட்சிகளின் உதவி இயக்குநா் ஆ.செல்லதுரை, முன்னோடி வங்கி மேலாளா் அனில், டி.ஆண்டிபட்டி ஊராட்சித் தலைவா்ஆ.மீனாள் ஆசைத்தம்பி, வங்கியின் கச்சைகட்டி கிளை மேலாளா் கே.ராஜேஷ்குமாா் உள்ளிட்ட பலா் கலந்து கொண்டனா்.