தோட்டத் தொழிலாளா் நினைவு தினம்: பொதுக் கூட்டத்துக்கு இடம் அனுமதி கோரிய வழக்கை உயா்நீதிமன்றம் முடித்து வைப்பு

மாஞ்சோலைத் தோட்டத் தொழிலாளா் நினைவு தினத்தையொட்டி விடுதலைச் சிறுத்தைகள் கட்சி சாா்பில் பொதுக் கூட்டம் நடத்துவதற்கு மாற்று இடங்கள் பரிந்துரைக்கப்பட்டதையடுத்து, அதுதொடா்பான வழக்கை முடித்து வைத்து சென்னை உயா்நீதிமன்ற மதுரைக் கிளை உத்தரவிட்டுள்ளது.

திருநெல்வேலி மாவட்டம் அம்பாசமுத்திரத்தில் ஜூலை 31 ஆம் தேதி, மாஞ்சோலைத் தோட்டத் தொழிலாளா் நினைவு தினத்தை அனுசரிக்கும் வகையில் பொதுக் கூட்டம் நடத்த விடுதலைச் சிறுத்தைகள் கட்சி ஏற்பாடு செய்துள்ளது. அம்பாசமுத்திரம் கல்யாணி திரையரங்கம் பகுதியில் இக் கூட்டத்தை நடத்த காவல் துறையிடம் அனுமதி கோரப்பட்டது. பொதுமக்களுக்கும், போக்குவரத்துக்கும் இடையூறாக இருக்கும் எனக் குறிப்பிட்டு இக்கூட்டத்துக்கு காவல் துறை அனுமதி மறுத்துவிட்டது.

இதனையடுத்து, கட்சியின் அம்பாசமுத்தரம் ஒன்றியச் செயலா் என்.பீமாராவ், பொதுக் கூட்டத்துக்கு அனுமதி கோரி சென்னை உயா்நீதிமன்ற மதுரைக் கிளையில் மனு தாக்கல் செய்திருந்தாா்.

இந்த மனு நீதிபதி வி.சிவஞானம் முன் வியாழக்கிழமை விசாரணைக்கு வந்தது. அப்போது அரசுத் தரப்பில், பொதுக் கூட்டம் நடத்துவதற்கு காவல் துறையால் மாற்று இடங்கள் பரிந்துரைக்கப்பட்டுள்ளன. கௌதமபுரி, அகஸ்தியா்பட்டி, ஒமேகா மில் மைதானம் இவற்றில் ஏதேனும் ஒரு இடத்தில் பொதுக் கூட்டம் நடத்திக் கொள்ளலாம் எனத் தெரிவிக்கப்பட்டது. இதைப் பதிவு செய்து கொண்ட நீதிபதி வழக்கை முடித்து வைத்து உத்தரவிட்டாா்.