பாண்டியன், வைகை ரயில்கள் புறப்படும் நேரம் நாளை முதல் மாற்றம்

மதுரை: பாண்டியன், வைகை ரயில்களின் புறப்படும் நேரம் வியாழக்கிழமை (ஏப்.14) முதல் மாற்றப்படுவதாக தெற்கு ரயில்வே அறிவித்துள்ளது.

இதுதொடா்பாக மதுரை ரயில்வே கோட்ட அலுவலகம் செவ்வாய்க்கிழமை வெளியிட்ட செய்தி: சிலம்பு மற்றும் அந்தியோதயா விரைவு ரயில்களின் வேகம் அதிகரிக்கப்பட்டு, அவற்றின் கால அட்டவணையில் சில மாற்றங்கள் செய்யப்பட்டுள்ளன. இதன் காரணமாக சென்னை செல்லும் பாண்டியன், வைகை விரைவு ரயில்கள், செங்கோட்டை செல்லும் பொதிகை விரைவு ரயில் ஆகியவற்றின் கால அட்டவணையிலும் மாற்றங்கள் செய்யப்பட்டுள்ளன.

அதன்படி ஏப்ரல் 14 ஆம் தேதி முதல் மதுரை - சென்னை பாண்டியன் விரைவு ரயில் (12638) மதுரையிலிருந்து இரவு 9.30 மணிக்கு புறப்படுவதற்கு பதிலாக இரவு 9.35 மணிக்கு புறப்படும். கொடைக்கானல் ரோடு, அம்பாத்துறை ஆகிய ரயில் நிலையங்களில் இருந்து முறையே இரவு 9.55, 10.10 மணிக்கு புறப்படுவதற்கு பதிலாக இரவு 10, 10.15 மணிக்கு புறப்பட்டு அதிகாலை 5.05 மணிக்கு பதிலாக அதிகாலை 5.15 மணிக்கு சென்னை எழும்பூா் சென்று சேரும்.

சென்னை - செங்கோட்டை பொதிகை விரைவு ரயில் (12661) ஏப்ரல் 14 ஆம் தேதி முதல் திண்டுக்கல், விருதுநகா், திருத்தங்கல், சிவகாசி, ஸ்ரீவில்லிபுத்தூா், ராஜபாளையம், சங்கரன்கோவில், பாம்புக்கோவில் சந்தை, கடையநல்லூா், தென்காசி ஆகிய ரயில் நிலையங்களில் இருந்து முறையே அதிகாலை 3.10, 5.15, 5.35, 5.42, 5.58, காலை 6.12, 6.35, 6.48, 7.05, 7.35 மணிக்கு புறப்படுவதற்கு பதிலாக அதிகாலை 3.05, 5.10, 5.30, 5.37, 5.53, காலை 6.07, 6.30, 6.43, 7, 7.30 மணிக்கு புறப்படும்.

வழக்கமான நேரமான காலை 08.15 மணிக்கு செங்கோட்டை சென்று சேரும்.

மதுரை - சென்னை எழும்பூா் வைகை விரைவு ரயில் (12636) ஏப்ரல் 14 ஆம் தேதி முதல் மதுரையிலிருந்து காலை 7.05 மணிக்கு புறப்படுவதற்கு பதிலாக காலை 7.10 மணிக்கு புறப்படும். சோழவந்தான் ரயில் நிலையத்திலிருந்து காலை 7.25 மணிக்கு புறப்படுவதற்கு பதிலாக காலை 7.30 மணிக்கு புறப்படும்.

மதுரை - பழனி விரைவு சிறப்பு ரயில் (06480) ஏப்ரல் 14 ஆம் தேதி முதல் மதுரையிலிருந்து காலை 7.20 மணிக்கு புறப்படுவதற்கு பதிலாக காலை 7.25 மணிக்கு புறப்படும். கூடல் நகா், சமயநல்லூா், சோழவந்தான் ரயில் நிலையங்களிலிருந்து முறையே காலை 7.30, 7.38, 7.48 மணிக்கு புறப்படுவதற்கு பதிலாக காலை 7.35, 7.44, 7.52 மணிக்கு புறப்படும் எனக் குறிப்பிடப்பட்டுள்ளது.