தேசிய கைத்தறி தினம்: நெசவாளா்களுக்கு நலத் திட்ட உதவிகள்

மதுரை: தேசிய கைத்தறி தினத்தை முன்னிட்டு, மதுரை மாவட்டத்தைச் சோ்ந்த 13 நெசவாளா்களுக்கு ரூ. 10.38 லட்சத்தில் நலத் திட்ட உதவிகளை மதுரை மாவட்ட ஆட்சியா் மா. சௌ. சங்கீதா வழங்கினாா்.

மதுரை விஸ்வநாதபுரம் பகுதியில் உள்ள ரோட்டரி ஹாலில் 9-ஆவது தேசிய கைத்தறி தின விழாவை முன்னிட்டு, மாவட்ட அளவிலான கைத்தறி கண்காட்சி, மருத்துவ முகாம் திங்கள்கிழமை நடைபெற்றது. இவற்றை மாவட்ட ஆட்சியா் மா. சௌ. சங்கீதா தொடங்கிவைத்தாா்.

இதைத் தொடா்ந்து, கைத்தறி நெசவாளா்களுக்கான முத்ரா கடன் திட்டத்தின் கீழ், 12 நெசவாளா்களுக்கு முத்ரா கடன் ரூ.7.50 லட்சம், மாநில கைத்தறி, துணிநூல் துறை அமைச்சரின் மானியக் கோரிக்கை அறிவிப்புக்கிணங்க நெசவாளா் வீடு கட்டும் திட்டத்தின் கீழ், ஒரு பயனாளிக்கு ரூ.2.88 லட்சம் என மொத்தம் 13 நெசவாளா்களுக்கு ரூ. 10.38 லட்சம் மதிப்பிலான நலத் திட்ட உதவிகளை ஆட்சியா் வழங்கினாா்.

சிறப்பு கைத்தறி கண்காட்சியில் மதுரை பகுதியில் உள்ள கைத்தறி நெசவாளா்களால் நெசவு செய்யப்பட்ட கைத்தறி ஜவுளிகள், கோ-ஆப் டெக்ஸ் ஜவுளிகள் விற்பனைக்கு காட்சிப்படுத்தப்பட்டன. நிலையூா், கைத்தறிநகா் பகுதியில் உள்ள நெசவாளா் அல்லாத கல்லூரி படிப்பு முடித்த 25 பயனாளிகளுக்கு கைத்தறி நெசவு சம்மந்தமான தொழில் முனைவு நெசவுப் பயிற்சி வழங்கப்பட்டது. டி.குன்னத்தூா் முருகன் தொழிலியல் நெசவாளா் கூட்டுறவு சங்கம் சாா்பில் இலவச கண் பரிசோதனை முகாம், மரக்கன்று நடும் நிகழ்வு நடைபெற்றது.

நிகழ்வில் மதுரை சரக கைத்தறி துறை உதவி இயக்குநா் எஸ்.பாலசுப்பிரமணியன், பாங்க் ஆப் இந்தியா, கனரா வங்கி மேலாளா்கள், தொழில் முனைவோா், ரோட்டரி சங்க நிா்வாகிகள், கைத்தறித் துறை அலுவலா்கள் கலந்து கொண்டனா்.