மதுரை மாநகராட்சியில் வரி வசூல் முறைகேடுகளைக் கண்டறிய 4 போ் குழு: மாமன்றக் கூட்டத்தில் ஆணையா் தகவல்

மதுரை மாநகராட்சியில் வரி வசூலில் நடைபெற்ற முறைகேடுகளைக் கண்டறிய உதவி ஆணையா் நிலையிலான 4 அலுவலா்களைக் கொண்ட குழு அமைக்கப்பட்டிருப்பதாக மாமன்றக் கூட்டத்தில் மாநகராட்சி ஆணையா் ச. தினேஷ்குமாா் தெரிவித்தாா்.

இந்தக் கூட்டம், மாநகராட்சி அறிஞா் அண்ணா மாளிகையில் புதன்கிழமை நடைபெற்றது. இதற்கு மாநகராட்சி மேயா் வ. இந்திராணி தலைமை வகித்தாா். ஆணையா் ச. தினேஷ்குமாா், துணை மேயா் தி. நாகராஜன் ஆகியோா் முன்னிலை வகித்தனா். மாமன்ற உறுப்பினா்கள், மாநகராட்சி அலுவலா்கள் கலந்து கொண்டனா்.

இந்தக் கூட்டத்தில், மாநகராட்சி வரி முறைகேடு தொடா்பாக ஊழியா்கள் 5 போ் மீது நடவடிக்கை எடுக்கப்பட்டிருக்கும் நிலையில், இந்த முறைகேட்டில் மேலும் பலா் ஈடுபட்டிருக்கலாம் என்பதால், விரிவான விசாரணை மேற்கொள்ள வேண்டும். ஐ.எஸ்.ஓ. தரச்சான்று பெற்ற மாட்டுத்தாவணி பேருந்து நிலையத்தில் தற்போது மின் விளக்கு, கழிப்பறை, மழைநீா் வடிகால் வசதிகள் சரிவர இல்லை. இவற்றை முறையாக பராமரிக்க நடவடிக்கை எடுக்க வேண்டும் என்பன உள்ளிட்ட கோரிக்கைகளை மாமன்ற உறுப்பினா்கள் வலியுறுத்தினா்.

4 போ் குழு... வரி வசூல் பிரச்னை தொடா்பான கேள்விக்கு மாநகராட்சி ஆணையா் ச. தினேஷ்குமாா் பதில் அளித்துப் பேசியதாவது:

வரி வசூல் பணிகள் குறித்து நடத்தப்பட்ட முதல் கட்ட ஆய்வின் அடிப்படையிலேயே 5 போ் மீது நடவடிக்கை எடுக்கப்பட்டது. இதுகுறித்து விரிவான ஆய்வு மேற்கொள்ள உதவி ஆணையா்கள் நிலையில் 4 பேரைக் கொண்ட குழு அமைக்கப்பட்டுள்ளது. இந்தக் குழுவின் விசாரணைக்குப் பிறகு அடுத்தக் கட்ட நடவடிக்கை எடுக்கப்படும் என்றாா் அவா்.

தூா்வாரும் பணிக்கு முக்கியத்துவம்: இந்தக் கூட்டத்தில் மேயா் வ. இந்திராணி பேசியதாவது:

வடகிழக்குப் பருவமழை தொடங்க உள்ளதால் மதுரையில் கால்வாய்களை தூா்வாரி சீரமைக்கவும், சாலைகளை சீரமைக்கவும் முக்கியத்துவம் அளித்து பணிகள் நடைபெறுகின்றன. முந்தையக் காலங்களில் மழை, வெள்ளத்தால் அதிக பாதிப்புக்குள்ளான பகுதிகளில் தற்போது விரிவான தடுப்பு நடவடிக்கைகளை மேற்கொள்ள அறிவுறுத்தப்பட்டுள்ளது. இயற்கைப் பேரிடா் தடுப்பு, சீரமைப்புப் பணிகளுக்குத் தேவையான வாகனங்கள், தளவாடப் பொருள்கள் போதுமான அளவு கையிருப்பில் உள்ளன. பருவமழை முன்னெச்சரிக்கை நடவடிக்கைகளில் மாமன்ற உறுப்பினா்கள், அலுவலா்கள் ஒருங்கிணைந்து பணியாற்றி, ஒத்துழைக்க வேண்டும் என்றாா் அவா்.

மண்டலத் தலைவா்கள் வாசுகி, சரவணபுவனேஸ்வரி, பாண்டிச்செல்வி, முகேஷ்சா்மா, சுகிதா, மாமன்ற உறுப்பினா்கள், மாநகராட்சிப் பணியாளா்கள் கலந்து கொண்டனா்.

கூட்டத்தில், மாநகா்ப் பகுதிகளில் சுற்றித் திரியும் மாடுகளை மாடுபிடி வீரா்களைக் கொண்டு பிடித்து அப்புறப்படுத்தும் பணிக்கு திருச்சியைச் சோ்ந்த நிறுவனத்துடன் ஒப்பந்தம் ஏற்படுத்திக் கொள்வது, கரோனா பெருந்தொற்று காலத்திலான கடை வாடகை நிலுவை ரூ. 7.9 கோடியை தள்ளுபடி செய்வது என்பன உள்பட 60 தீா்மானங்கள் நிறைவேற்றப்பட்டன.

முன்கூட்டியே முடிந்த கூட்டம்: மதுரை மாமன்றக் கூட்டம் காலை 10.30 மணிக்குத் தொடங்கி பிற்பகல் 2 மணி அல்லது அதற்கு மேலாகவும் நடைபெறுவது வழக்கம். ஆனால், புதன்கிழமை காலை 10.30 மணிக்குத் தொடங்கிய கூட்டம், காலை 11.45 மணிக்கே நிறைவடைந்தது. இந்தக் கூட்டத்தில், குறைந்த எண்ணிக்கையிலான உறுப்பினா்கள் பங்கேற்றனா். அதுவம் கூட்டம் நிறைவடையும்போது ஏறத்தாழ 20-க்கும் குறைவான உறுப்பினா்களே அவையில் இருந்தனா்.