தொண்டி அருகே சடலத்தை  கொண்டு செல்ல எதிர்ப்பு: அதிகாரிகள் சமரசம்

தொண்டி அருகே செவ்வாய்க்கிழமை இறந்தவரின் சடலத்தை ஊர்வலமாக கொண்டு செல்வதற்கு ஒரு தரப்பினர் எதிர்ப்பு தெரிவித்ததையடுத்து அதிகாரிகள் சமரசம் செய்து வைத்தனர். 
ராமாநாதபுரம் மாவட்டம்  தொண்டி அருகே எட்டுசேரி கிராமத்தை சேர்ந்தவர் சிலம்பன் (90). இவர் வயது முதிர்வு காரணமாக செவ்வாய்க்கிழமை உயிரிழந்தார். இவரது சடலத்தை அடக்கம் செய்ய இடுகாட்டுக்கு கொண்டு செல்லும் போது, தங்களது தெரு வழியாக வரக்கூடாது என ஒரு தரப்பினர் எதிர்ப்புத் தெரிவித்தனர். இதனால் இரு தரப்பினரிடையே பிரச்னை ஏற்பட்டது. 
தகவலறிந்த திருவாடானை வட்டாட்சியர் சேகர், காவல்துறை துணை கண்காணிப்பாளர் விஜயகுமார், தொண்டி ஆய்வாளர் பிரபு, சார்பு ஆய்வாளர் முருகானந்தம் ஆகியோர் சம்பவ இடத்திற்குச் சென்று பேச்சுவார்த்தை நடத்தினர். இதனைத்தொடர்ந்து சடலம், அதே பாதை வழியாக இடுகாட்டுக்கு கொண்டு சென்று அடக்கம் செய்யப்பட்டது. இதுதொடர்பாக புதன்கிழமை இருதரப்பினர் பங்கேற்கும் சமரசக் கூட்டம் நடைபெறும் என வட்டாட்சியர் தெரிவித்தார்.