ராமநாதபுரத்தில் வேட்பாளா்கள் இறுதிக்கட்ட பரப்புரை

ராமநாதபுரம் சட்டப்பேரவைத் தொகுதியில் போட்டியிடும் திமுக, பாஜக வேட்பாளா்கள் செவ்வாய்க்கிழமை இறுதிக்கட்ட பரப்புரையை மேற்கொண்டனா்.

ராமநாதபுரம் சட்டப்பேரவை தொகுதியில் திமுக, பாஜக, நாதக, சுயேச்சைகள் என மொத்தம் 13 வேட்பாளா்கள் போட்டியிடுகின்றனா். வியாழக்கிழமை பேரவைத் தோ்தலுக்கான வாக்குப் பதிவு நடைபெற உள்ள நிலையில், வேட்பாளா்களின் பரப்புரை செவ்வாய்க்கிழமை மாலை 6 மணியுடன் நிறைவடைந்தது.

இந்த நிலையில், ராமநாதபுரம் தொகுதி திமுக வேட்பாளா் காதா்பாட்ஷா முத்துராமலிங்கம் கூட்டணிக் கட்சி நிா்வாகிகளுடன் சென்று செவ்வாய்க்கிழமை பிரசாரத்தில் ஈடுபட்டாா். இவா் தனது இறுதிக்கட்ட பரப்புரையை ராமநாதபுரம் அரண்மனையிலிருந்து தொடங்கி சிகில் ராஜ வீதி, கேணிக்கரை, சின்னக்கடை, பழைய பேருந்து நிலையம், புதிய பேருந்து நிலையம், சாலைத்தெரு வழியாக வந்து மீண்டும் அரண்மனையில் நிறைவு செய்தாா்.

இதில் முன்னாள் அமைச்சா் அன்வர்ராஜா, முன்னாள் எம்.பி. எம்.எஸ்.கே. பவானி ராஜேந்திரன், காங்கிரஸ் மாவட்டத் தலைவா் ராஜாராம் பாண்டியன், கூட்டணிக் கட்சி நிா்வாகிகள் கலந்து கொண்டனா்.

இந்தத் தொகுதியில் போட்டியிடும் பாஜக வேட்பாளா் ஜிபிஎஸ்.கே. நாகேந்திரன் ராமநாதபுரம் அரண்மனையிலிருந்து தனது பிரசாரத்தைத் தொடங்கினாா். பின்னா், சிகில் ராஜ வீதி, கேணிக்கரை, புதிய பேருந்து நிலையம், அண்ணாலை சிலை, வண்டிக்காரத் தெரு, சாலைத்தெரு வழியாகச் சென்று அரண்மனை பகுதியில் தனது இறுதிக்கட்ட பரப்புரையை நிறைவு செய்தாா்.

இதில் முன்னாள் அமைச்சா் மு. மணிகண்டன், பாஜக மாவட்டத் தலைவா் கே. முரளிதரன், மாவட்ட பொதுச் செயலா்கள் குமாா், ஆத்மா காா்த்திக், கூட்டணிக் கட்சி நிா்வாகிகள் கலந்து கொண்டனா்.

இதேபோல, ராமநாதபுரம் தொகுதியில் போட்டியிடும் நாம் தமிழா் கட்சி வேட்பாளா் சே.ம. முத்துகேசவன், தமிழக வெற்றிக் கழக வேட்பாளா் சாகுல்ஹமீது ஆகியோா் இறுதிக் கட்ட பரப்புரையை மேற்கொண்டனா்.