கதர் வாரியத்தில் ரூ.10 கோடியில் பட்டுப் புடவைகள் தயாரிக்க இலக்கு: அமைச்சர்

கதர் வாரியத்தின் மூலம் தயாரிக்கப்படும் பட்டுப்புடவைகளுக்கு பெண்களிடம் வரவேற்பு உள்ளதால் நடப்பு நிதியாண்டில் (2018-19) உற்பத்தித் திறனை அதிகரிக்கும் வகையில் 500 பட்டு நெசவாளர்களை கூடுதலாகச் சேர்த்து ரூ. 10 கோடி மதிப்புள்ள பட்டுப்புடவைகள் தயாரிக்க இலக்கு நிர்ணயம் செய்யப்பட்டுள்ளது என்று தமிழ்நாடு கதர் மற்றும் கிராமத்தொழில்கள் வாரியத்துறை அமைச்சர் ஜி. பாஸ்கரன் தெரிவித்தார்.
சிவகங்கை மாவட்டம் காரைக்குடி அம்மன் சன்னதி வீதியில் கதர் மற்றும் கிராமத்தொழில்கள் வாரியத்துறையின் மூலம் காதி கிராப்ட் பட்டு எம்போரியம் விற்பனை மையத்தை திங்கள்கிழமை திறந்து வைத்து அமைச்சர் கூறியது: கதர் வாரியத்தின் மூலம் கடந்த நிதியாண்டில் (2017-18) ரூ.5 கோடியே 3 லட்சத்து 75 ஆயிரம் மதிப்பீட்டில் கதர்வாரியத்தின் மூலம் பட்டுப்புடவைகள் தயாரிக்கப்பட்டு விற்பனையில் சாதனை படைக்கப்பட்டுள்ளது. நடப்பு நிதியாண்டில் (2018 - 19) உற்பத்தித் திறனை அதிகரித்திடும் வகையில் 500 பட்டு நெசவாளர்களை கூடுதலாகச் சேர்த்து ரூ. 10 கோடி மதிப்புள்ள பட்டுப்புடவைகள் தயாரிக்க இலக்கு நிர்ணயம் செய்யப்பட்டுள்ளது.
கதர் கிராமத்தொழில்கள் வாரியத்துறையின் மூலம் தயாரிக்கப்படும் ஆடைகளுக்கு 30 சதவீதம் தள்ளுபடியும், ஜி.எஸ்.டி வரி நீக்கப்பட்டும் விற்பனை செய்யப்படுகிறது. காரைக்குடியில் ரூ. 6 லட்சம் மதிப்பில் புதிதாக மேம்படுத்தப்பட்ட காதி கிராப்ட் பட்டு எம்போரியம் விற்பனை மையம் திறந்து வைக்கப்பட்டுள்ளது. இங்கு ரூ. 40 லட்சம் விற்பனை இலக்கு நிர்ணயம் செய்யப்பட்டுள்ளது என்றார்.
பின்னர் காரைக்குடி அருகே கண்டனூர் கதர் வளாகத்தில் ரூ. 30 லட்சம் மதிப்பிலான புதிய திரவ சோப்பு நிறுவனத்தை அமைச்சர் தொடக்கி வைத்தார். அமைச்சருடன் கதர் கிராமத் தொழில் வாரிய தலைமை செயல் அலுவலர் சி. நடராஜன், மாவட்ட ஆட்சியர் க. லதா, சிவகங்கை எம்.பி பி.ஆர். செந்தில்நாதன், கதர் கிராமத்தொழில் வாரியத் துறை மண்டல துணை இயக்குநர் அருணாசலம், உதவி இயக்குநர் குமார் உள்ளிட்டோர் உடனிருந்தனர்.