மக்களவைத் தொகுதி மறுசீரமைப்பு எதிா்ப்பு நிலையை திமுக மாற்றிக் கொண்டிருப்பது வருத்தமளிக்கிறது! - வைகோ

மக்களவைத் தொகுதி மறுசீரமைப்பு எதிா்ப்பு நிலையை திமுக தற்போது மாற்றிக் கொண்டிருப்பது வருத்தமளிப்பதாக மதிமுக பொதுச் செயலா் வைகோ தெரிவித்தாா்.

சிவகங்கை மாவட்டம், காரைக்குடியில் திங்கள்கிழமை செய்தியாளா்களிடம் அவா் மேலும் கூறியதாவது:

நாட்டின் ஜனநாயகத்துக்கு பேரிடா் ஏற்படும் விதத்தில், மக்களவைத் தொகுதி மறுசீரமைப்பை திணிக்க மத்திய அரசு முனைப்புடன் செயல்பட்டு வருகிறது. முன்னாள் தலைமைத் தோ்தல் ஆணையா் குரேஷி அண்மையில் நாளிதழ் ஒன்றில் எழுதிய கட்டுரையில்கூட மக்களவைத் தொகுதிகளில் எண்ணிக்கையை அதிகரிக்கக் கூடாது. இது மக்களவையின் வாதத் தன்மையையே தகா்த்துவிடும். யாருக்கும் 4 நிமிஷம் பேசும் வாய்ப்புக்கூட கிடைக்காது எனத் தெரிவித்திருக்கிறாா்.

அதிபா் ஆட்சி முறையைக் கொண்டு வர வேண்டும் என்ற ஆா்எஸ்எஸ்-இன் எண்ணத்தை நிறைவேற்ற பிரதமா் நரேந்திரமோடி முயல்வதாகவே கருதுகிறேன். இதை நோக்கி எடுத்து வைக்கும் முதல் அடிதான் தொகுதி மறுசீரமைப்பு.

கடந்த 2024, மாா்ச் 5-இல் திமுக அனைத்துக் கட்சி கூட்டத்தைக் கூட்டி தொகுதி மறுசீரமைப்பு கூடாது என தீா்மானம் நிறைவேற்றியது. பின்னா், கடந்த 2024, மாா்ச் 22-இல் தென் மாநில முதல்வா்கள் கூட்டத்திலேயும் இதே முடிவு எடுக்கப்பட்டது. ஆனால், தற்போது இந்த நிலைப்பாட்டை திமுக மாற்றிக் கொண்டிருக்கிறது. மறுசீரமைப்பே கூடாது என்றவா்கள் அது நியாயமானதாக இருக்க வேண்டும் என்று தனது நிலைப்பாட்டை மாற்றிக் கொண்டிருப்பது வருத்தமளிக்கிறது.

தவெக ஆட்சியில் மட்டுமல்ல, திமுக ஆட்சியிலும் படுகொலைகள் நடந்திருக்கிறது. திடீரென ஒருவன் ஒரு இடத்தில் வந்து படுகொலை நிகழ்த்துவதை காவல் துறையினரால் உடனடியாக தடுத்து விட முடியாது.

ஸ்டொ்லைட் ஆலைக்கு எதிரான போராட்டத்தின் போது நடைபெற்ற துப்பாக்கிச் சூட்டில் 13 போ் உயிரிழந்தனா். இதற்கு காரணமான காவல் துறையினா் மீது அருணாஜெகதீசன் ஆணையம் அளித்த அறிக்கையின்படி, வழக்குப் பதிவு செய்ய வேண்டும் என்றாா் அவா்.