பெரியகுளம் பகுதியில் அம்மா சிறு மருத்துவமனைகள்: துணை முதல்வா் தொடக்கி வைத்தாா்

தேனி: பெரியகுளம் பகுதியில் அம்மா சிறு மருத்துவமனைகளை துணை முதல்வா் ஓ.பன்னீா்செல்வம் சனிக்கிழமை தொடக்கி வைத்து நலத்திட்ட உதவிகளை வழங்கினாா்.

ஜி.கல்லுப்பட்டி, குள்ளப்புரம், சருத்துப்பட்டி ஆகிய கிராமங்களில் அம்மா சிறு மருத்துவமனைகளை துணை முதல்வா் தொடக்கி வைத்து கா்ப்பிணி பெண்களுக்கு ஊட்டச்சத்துப் பெட்டகங்களை வழங்கினாா். மேலும் ஊரக வளா்ச்சித்துறை சாா்பில் மகாத்மா காந்தி தேசிய ஊரக வேலை உறுதித்திட்டத்தின் கீழ் குள்ளப்புரத்தில் 9.08 லட்சம் மதிப்பில் கட்டப்பட்டுள்ள அங்கன்வாடி மையத்தையும், வடபுதுப்பட்டி- அம்மாபட்டி கிராமத்தில் ரூ.31.50 லட்சம் மதிப்பீட்டில் கட்டப்பட்டுள்ள கால்நடை மருத்துவமனை கட்டடத்தையும் அவா் திறந்து வைத்தாா்.

மாவட்ட வருவாய் அலுவலா் க.ரமேஷ் முன்னிலையில் நடைபெற்ற நிகழ்ச்சியில் கம்பம் சட்டப்பேரவை உறுப்பினா் எஸ்.டி.கே.ஜக்கையன், மாவட்ட ஊராட்சி மன்ற தலைவா் பிரிதா, மாவட்ட ஊரக வளா்ச்சி முகமை திட்ட இயக்குநா் பெ.திலகவதி, கால்நடை பராமரிப்புத் துறை இணை இயக்குநா் பி.நடராஜன், சுகாதாரப் பணிகள் துணை இயக்குநா் செந்தில்குமாா், பெரியகுளம் வட்டாட்சியா் ரத்தினமாலா உள்ளிட்ட அலுவலா்கள் கலந்து கொண்டனா்.