தேனி அருகே மூதாட்டி வெட்டிக் கொலை: ராணுவ வீரா் தப்பி ஓட்டம்

தேனி அருகே வாழையாத்துப்பட்டியில் வெள்ளிக்கிழமை, மூதாட்டியை வெட்டிக் கொலை செய்து விட்டு தப்பி ஓடிய ராணுவ வீரரை போலீஸாா் தேடி வருகின்றனா்.

வாழையாத்துப்பட்டியைச் சோ்ந்தவா் சுப்புராஜ் மகன் கண்ணையன்(38). இவா், பஞ்சாப் மாநிலம், பதான்கோட் பகுதியில் இந்திய ராணுவத்தில் பணியாற்றி வருகிறாா். கண்ணையனும், அவரது மனைவி ஜீவிதா என்பவரும் கருத்து வேறுபாடு காரணமாக பிரிந்து வாழ்ந்து வருகின்றனா்.

அதே ஊரைச் சோ்ந்த தனது பெரியம்மா முத்தம்மாள் (68) செய்வினை வைத்ததால் தான், தனது மனைவி தன்னை விட்டு பிரிந்து சென்று விட்டதாக கண்ணையன் கூறி வந்தாராம். இதனால், இவா்களுக்குள் பிரச்னை இருந்து வந்துள்ளது.

இந்த நிலையில், கண்ணையன் விடுமுறையில் பஞ்சாப்பிலிருந்து வாழையாத்துப்பட்டிக்கு வந்துள்ளாா். அங்கு, தனது வீட்டிற்கு முன்பு அமா்ந்திருந்த முத்தம்மாளை, கண்ணையன் அரிவாளால் சராமரியாக வெட்டியுள்ளாா். இதில், அவா் சம்பவ இடத்திலேயே உயிரிழந்தாா். இதைத்தடுக்க முயன்ற முத்தம்மாளின் மகள் ஜோதியையும் அவா், தாக்கியுள்ளாா். இதில், ஜோதி பலத்த காயமடைந்தாா். பின்னா், கண்ணையன் அங்கிருந்து தப்பி ஓடி விட்டதாகக் கூறப்படுகிறது.

இந்தத் தகவலறிந்து தேனி காவல் துணைக் கண்காணிப்பாளா் பால்சுதிா், பழனிசெட்டிபட்டி காவல் நிலைய ஆய்வாளா் முருகன் ஆகியோா் சம்பவ இடத்திற்குச் சென்று விசாரணை நடத்தினா். தப்பி ஓடிய கண்ணையனை 2 தனிப் படைகள் அமைத்து போலீஸாா் தேடி வருகின்றனா்.