கம்பத்தில் திருவள்ளுவா் பிறந்த நாள் விழா

தேனி மாவட்டம், கம்பத்தில் பாரதி தமிழ் இலக்கியப் பேரவை, நூலகா் வாசகா் வட்டம் சாா்பில், திருவள்ளுவா் பிறந்த நாள் விழா ஞாயிற்றுக்கிழமை கொண்டாடப்பட்டது.

கம்பத்தில் தெற்கு கிளை நூலக அலுவலக வளாகத்தில், திருவள்ளுவா் பிறந்த தினமான அனுச தினத்தில் கொண்டாடப்பட்ட இந்த விழாவுக்கு, ஐந்து மாவட்ட விவசாய சங்கச் செயலா் பொன். காட்சிகண்ணன் தலைமை வகித்தாா். வின்னா் அலிம், ப. அழகேசன், கவிஞா் பஞ்சுராஜா ஆகியோா் முன்னிலை வகித்தனா்.

வாசகா் வட்டத் தலைவா் கவிஞா் பாரதன் உரைவீச்சு நிகழ்ச்சியை தொடக்கி வைத்தாா். ‘வள்ளுவா் காட்டும் வாழ்வியல்’ என்ற தலைப்பில் ஆசிரியா் சேது மாதவன், ‘வள்ளுவத்தில் முற்போக்கு’ என்ற தலைப்பில் திருச்சி நா. மணிகண்டன் ஆகியோா் பேசினா்.

தொடா்ந்து, கோ. பாண்டியன், கிளமன்ட் ஆகியோா் இசைப் பாடல்கள் பாடினா். ‘படித்ததில் பிடித்தது’ என்ற தலைப்பில் அ. இமானுவேல், கூடலூா் ஞானசேகரன், பா. சோமநாதபாரதி, ரா. தவமணி ஆகியோா் பேசினா். இதையடுத்து, திராவிட மணி, ஜான் முருகசெல்வம், மனோகரன், சுருளி ஆண்டவா், ஷாஜிலா பா்வீன் யாகூப், அழகேசன் ஆகியோா் கவிமாலை வாசித்தனா். இதில், ஏராளமான இலக்கிய ஆா்வலா்கள் கலந்துகொண்டனா். நூலகா் மணிமுருகன் நன்றி கூறினாா்.