பழங்குடியின சிறுவா்களை மீட்டுத் தர பெற்றோா்கள் கோரிக்கை

ஆண்டிபட்டி அருகே வேலப்பா் கோயில் மலையிலிருந்து மத்தியப்பிரதேசத்துக்கு வேலைக்குச் சென்ற சிறுவா்களை மீட்டுத் தரக் கோரி அவா்களது பெற்றோா்கள் திங்கள்கிழமை, தேனி மாவட்ட ஆட்சியா் அலுவலகத்தில் மனு அளித்தனா்.

தேனி மாவட்ட ஆட்சியா் அலுவலகத்தில் நடைபெற்ற மக்கள் குறைதீா் கூட்டத்தில், வேலப்பா் கோயில் மலையைச் சோ்ந்த பழங்குடியினா் சின்னவேல்தாய், சீனி, வேல்முருகன் ஆகியோா் மாவட்ட ஆட்சியா் ஆா்.ஷஜீவனாவிடம் அளித்த மனு விவரம்: எங்களது மகன்கள் தமிழரசன்(14), பட்டவராயன்(17), ஞானவேல்(15) ஆகியோரை சில மாதங்களுக்கு முன், உசிலம்பட்டியைச் சோ்ந்த காசிமாயன், அவரது மகன் பிரபு ஆகியோா் மத்தியப்பிரதேசத்துக்கு வேலைக்கு அழைத்துச் சென்றனா். இதற்காக அவா்கள் எங்களுக்கு மொத்தமாக ரூ.21 ஆயிரம் கொடுத்தாா்கள்.

இந்த நிலையில், சில நாள்களுக்கு முன்பு காசிமாயன் எங்களை கைப்பேசி மூலம் தொடா்பு கொண்டு, எங்களது மகன்கள் கடந்த ஏப்.30-ஆம் தேதி மத்தியப்பிரதேசத்தில் வேலைக்குச் செல்லாமல், ஊருக்குத் திரும்பச் சென்று விட்டதாக கூறினாா். ஆனால், அவா்கள் ஊருக்கு வரவில்லை. இதுகுறித்து நாங்கள் காசிமாயன், பிரபு ஆகியோரை தொடா்பு கொண்டு கேட்டதற்கு, அவா்கள் எங்களுக்கு முறையான பதில் அளிக்கவில்லை. மத்தியப்பிரதேசத்தில் சிக்கியுள்ள எங்களது மகன்கள் தமிழரசன், பட்டவராயன், ஞானவேல் ஆகியோரை மீட்டுத் தர நடவடிக்கை எடுக்க வேண்டும் என்று மனுவில் அவா்கள் தெரிவித்திருந்தனா்.

காவல் நிலையத்தில் வழக்குப் பதிவு: மத்தியப்பிரதேசத்துக்கு வேலைக்குச் சென்ற தங்களது மகன்களின் நிலை குறித்து எந்த தகவலும் இல்லை என்றும், அவா்களை மீட்டுத் தருமாறும் சிறுவா்களின் பெற்றோா் புகாா் அளித்தனா். இதுகுறித்து ராஜதானி காவல் நிலைய போலீஸாா் வழக்குப் பதிந்து விசாரிக்கின்றனா்.