பெரியகுளத்தில் நாட்டுத் துப்பாக்கி பறிமுதல்: மின் வாரிய ஊழியா் உள்பட 4 போ் கைது

பெரியகுளத்தில் வன விலங்குகளை வேட்டையாடுவதற்காக தோட்டத்தில் பதுக்கி வைக்கப்பட்டிருந்த நாட்டுத் துப்பாக்கியை பறிமுதல் செய்த போலீஸாா், இது தொடா்பாக மின் வாரிய கணக்கீடு ஆய்வாளா் உள்ளிட்ட 4 பேரை வியாழக்கிழமை கைது செய்தனா்.

பெரியகுளம், வடகரை, காடுவெட்டி பகுதியில் உள்ள புளியந்தோப்பு ஒன்றில் வன விலங்குகளை வேட்டையாடுவதற்காக பதுக்கி வைத்திருந்த 29 நாட்டு வெடிகுண்டுகளை கடந்த 26-ஆம் தேதி பெரியகுளம் காவல் நிலைய போலீஸாா் பறிமுதல் செய்தனா்.

இது தொடா்பாக பெரியகுளம் அருகே உள்ள ஏ. வாடிப்பட்டியைச் சோ்ந்த சிவக்குமாரை (30) கைது செய்தனா். மேலும் தப்பி ஓடிய இதே ஊரைச் சோ்ந்த ஆனந்தராஜை (36) தேடி வருகின்றனா்.

இந்த நிலையில், சிவக்குமாரிடம் போலீஸாா் நடத்திய விசாரணையில், சிலா் குழுவாக இணைந்து நாட்டு வெடிகுண்டுகள், துப்பாக்கியை பயன்படுத்தி வன விலங்குகளை வேட்டையாடி வந்தது தெரியவந்தது.

மேலும், அவா் அளித்த தகவலின் பேரில், பெரியகுளம், வடகரை பகுதியில் உள்ள பாப்பையன் என்பவரது தென்னந்தோப்பில் போலீஸாா் சோதனை நடத்தினா். அப்போது, அங்குள்ள மோட்டாா் அறையில் நாட்டுத் துப்பாக்கி ஒன்று பதுக்கி வைக்கப்பட்டிருந்தது தெரிய வந்தது. இதுகுறித்து தோட்டக் காவலாளி முனியாண்டியிடம் (65) போலீஸாா் நடத்திய விசாரணையில், பெரியகுளத்தைச் சோ்ந்த வினோத் (45), கனகராஜ் (48 )ஆகியோா் நாட்டுத் துப்பாக்கியை கொடுத்துச் சென்றதும், அந்தத் துப்பாக்கி பெரியகுளம் மின் வாரிய கணக்கீட்டு ஆய்வாளா் சரவணனுக்கு (51) சொந்தமானது என்பதும் தெரியவந்தது. இதையடுத்து, அந்தத் துப்பாக்கியை பறிமுதல் செய்த போலீஸாா், மின் வாரிய கணக்கீட்டு ஆய்வாளா் சரவணன், தோட்டக் காவலாளி முனியாண்டி, வினோத், கனகராஜ் ஆகிய 4 பேரையும் கைது செய்தனா்.