பட்டாசு ஆலைகளை திறக்க வலியுறுத்தி சிவகாசியில் இருசக்கர வாகன பிரசாரம்

விருதுநகர் மாவட்டத்தில் மூடப்பட்டுள்ள பட்டாசு ஆலைகளைத் திறக்க வலியுறுத்தி, விருதுநகர் மாவட்ட பட்டாசு-தீப்பெட்டி தொழிலாளர் சங்கம் (சி.ஐ.யூ.டி.) சார்பில் திங்கள்கிழமை சிவகாசி ஒன்றியப் பகுதிகளில் இரு சக்கர வாகன பிரசாரம் நடைபெற்றது.
சிவகாசி-சாத்தூர் சாலையில் மீனம்பட்டியில் தொடங்கிய இப் பிரசாரம், பேராபட்டி, அனுப்பன்குளம், சுந்தர்ராஜபுரம், பாரைப்பட்டி உள்ளிட்ட கிராமங்களின் வழியே சிவகாசி-விருதுநகர் புறவழிச்சாலையில் நிறைவடைந்தது.
பின்னர் அப்பகுதி பொதுமக்களிடம் கோரிக்கைகளை வலியுறுத்திய துண்டுப் பிரசுரங்கள்  வினியோகிக்கப்பட்டன. 
இதில்,சி.ஐ.டி.யூ மாவட்ட செயலாளர் பி.என்.தேவா, மார்க்சிஸ்ட் கம்யூனிஸ்ட் கட்சி ஒன்றியச் செயலாளர் பாலசுப்பிரமணியன், சிவகாசி நகரச் செயலாளர் முருகன் உள்ளிட்டோர் கலந்து கொண்டனர்.