வரத்து கால்வாயில் ரயில்வே சுரங்க பாதை அமைக்கக் கிராம மக்கள் எதிர்ப்பு

திருச்சுழி அருகே கண்மாய்க்கு தண்ணீர் செல்லும் கால்வாயை மறித்து ரயில்வே சுரங்கப் பாதை அமைப்பதை தடை செய்ய வேண்டும் என எம். புளியங்குளம் கிராம மக்கள் திங்கள்கிழமை மாவட்ட ஆட்சியர் அ. சிவஞானத்திடம் மனு அளித்தனர்.
 அந்த மனுவில் கூறியிருப்பதாவது, திருச்சுழி ஊராட்சி ஒன்றியம் மிதலைக்குளம் ஊராட்சிக்குள்பட்ட பகுதியில் எம். புளியங்குளம் கிராமம் வழியாக விருதுநகர் மானாமதுரை செல்லும் ரயில்வே பாதை உள்ளது. இப்பகுதியில், கண்மாய்க்கு தண்ணீர் செல்லும் வரத்து கால்வாயை அடைத்து ரயில்வே சார்பில் சுரங்கப் பாதை அமைக்கப்பட்டு வருகிறது. இதனால், கண்மாய்க்கு தண்ணீர் வரத்து பாதிக் கப்படும். 
எனவே, ஏற்கெனவே உள்ள சாலை அருகே சுரங்கப் பாதை அமைக்க வேண்டும். மேலும் கிராமத்துக்குச் செல்லும் பாதையில் தரைப்பாலம் அமைக்க வேண்டும். அதேபோல், எங்கள் கிராமத்தில் கடந்த மூன்று ஆண்டுகளாக வறட்சி நிலவி வருவதால் நூறு நாள் வேலை திட்டத்தில் பணி வழங்க வேண்டும். மேலும், தற்போது கடுமையான குடிநீர் தட்டுப்பாடு உள்ளதால் ஆழ்துளை கிணறு அமைத்து குடிநீர் வழங்குவதுடன், தெருவிளக் குகளை சீரமைக்க வேண்டும் என அதில் குறிப்பிட்டுள்ளனர்.